पोखराका पर्यटन व्यवसायीले पोखरादेखि भारतका विभिन्न शहर र युनाइटेड अरब इमिरेट्स (युएई) मा सिधा हवाई उडान संचालन गर्न माग राखेका छन्।
प्रधानमन्त्री केपी शर्मा ओलीको आउँदा सेप्टेम्बरमा हुने भनिएको भारत भ्रमणको प्रमुख एजेण्डामा पोखरा–भारत सिधा हवाई उडान संचालनलाई राख्न व्यवसायीले माग राखेका हुन्।
भारतको राजधानी नयाँ दिल्ली, बनारश लगायतका शहरमा पोखराबाट सिधा उडान गर्न व्यवसायिक हिसाबले सम्भव हुने भन्दै व्यवसायीले अर्थमन्त्री विष्णु पौडेलमार्फत उक्त माग राखेका हुन्।
होटल संघ पोखराको पहलमा विहिबार अर्थमन्त्री पौडेललाई भेट्न पुगेका व्यवसायीले प्रधानमन्त्री ओलीलाई भेटेर उक्त माग राख्ने तयारी गरेका थिए।
प्रधानमन्त्रीको कार्यव्यस्तताले भेट्न नपाएकाले अर्थमन्त्रीमार्फत माग राखेको होटल संघ पोखराका अध्यक्ष लक्ष्मण सुवेदीले बताए।
‘प्रधानमन्त्री ज्युको भारत भ्रमणमा पोखराबाट भारतका विभिन्न शहरमा सिधा उडान गर्ने एजेण्डा राख्न हामीले अर्थमन्त्रीमार्फत माग राखेका छौं,’ उनले भने, ‘प्रधानमन्त्री ज्युको कार्यव्यस्तताले गर्दा भेट्न पाएनौं ।’
राज्यले ऋण लिएर पोखरा अन्तर्राष्ट्रिय विमानस्थल बनाए पनि नियमित संचालन हुन नसक्दा पर्यटन व्यवसाय पनि धरासायी भएको उनले बताए।
व्यवसायिक हिसाबले पनि पोखरादेखि भारतका विभिन्न शहरमा सिधा उडान सम्भव हुने भन्दै उनले कुटनीतिक पहलमा जोड दिन आग्रह गरे । उनले पोखराका ७ सय बढी होटलमा ५ खर्बभन्दा बढी लगानी रहेको बताए ।
व्यवसायीले अर्थमन्त्री पौडेलले चालु आर्थिक बर्षका लागि ल्याएको बजेटमा होटललाई पनि उद्योगको मान्यता दिने नीति चाडै कार्यान्वयनमा ल्याउन पनि माग गरेका छन्।
होटलहरु उद्योगमा दर्ता भए पनि अन्य उद्योगले पाउने सेवा सुविधा होटलले नपाएको भन्दै बजेटमा ल्याएको नीतिगत सुधार चाडै लागु गर्न माग गरेको सुवेदीले बताए।
पोखराका होटल व्यवसायीको प्रतिनिधि मण्डलले नेपालका लागि युनाइटेड अरब इमिरेट्स (युएइ)का राजदुत अब्दुल्ला सइद मुवारकलाई पनि पोखराबाट युएई सिधा हवाई उडानको पहल गरिदिन आग्रह गरेका छन् ।
गण्डकी क्षेत्रबाट बैदेशिक रोजगारीमा युएई जाने युवाको संख्या अत्याधिक रहेको र पोखरा घुम्न आउने धेरै पर्यटक युएई ट्रान्जिट भएर आउने गरेको भन्दै उनीहरुले पोखराबाट सिधा उडानको पहल गरिदिन आग्रह गरेका हुन् ।
पोखराका व्यवसायीसँगको भेटघाटमा राजदुत मुवारकले पोखराबाट युएई उडानका लागि आफुले एयरलाइन्स कम्पनीलाई प्रस्ताव राख्ने वचन दिएको होटल संघ पोखराका अध्यक्ष सुवेदीले बताए । युएइका लगानीकर्तालाई पोखराको पर्यटन व्यवसायमा लगानीका लागि पनि पहल गरिदिन भनेको उनले बताए ।
‘महामहिम राजदुतले पोखरा निकै मन परेकोले पटक पटक आउने गरेको बताउनुभयो। पोखराबाट युएई सिधा उडान गर्न पनि पहल गर्ने उहाँले वचन दिनुभएको छ,’ उनले भने, युएइका व्यवसायीलाई पनि पोखरामा लगानी भित्राउन छुट्टै छलफल गर्ने कुरा भएको छ ।’
होटल संघका केन्द्रीय सदस्यहरु विप्लव पौडेल, भरतराज पराजुली, पोखरा पर्यटन परिषदका पूर्व अध्यक्ष पोमनारायण श्रेष्ठ लगायत सहभागी प्रतिनिधी मण्डलले अर्थमन्त्री पौडेल र युएइका राजदुत भेटेका थिए ।
भेटमा अर्थमन्त्री पौडेलले पोखरा जोड्ने राजमार्गहरु निर्माणले गति लिएको र पोखराबाट अन्तर्राष्ट्रिय उडान जसरी पनि संचालन गर्न आवश्यक रहेको बताएका थिए ।
‘राज्यले ऋण लिएर बनाएको एयरपोर्ट जसरी पनि चलाउनुपर्छ, पोखरा र भैरहवा एयरपोर्टबाट अन्तर्राष्ट्रिय उडान गर्न पहल भइराखेको छ,’ उनले व्यवसायीलाई भने ।
पोखरा क्षेत्रीय अन्तर्राष्ट्रिय विमानस्थल २०७९ पुष १७ गतेदेखि संचालनमा आएको थियो । विमानस्थल संचालनमा आए पनि नियमित अन्तर्राष्ट्रिय उडान सुचारु हुन सकेको छैन ।
-1753341424.jpeg)
-1746009348.jpg)
