नेपाल वायु सेवा निगम (नेपाल एयरलाइन्स)ले अन्तर्राष्ट्रिय उडानको लागि खरिद गरेका दुई न्यारोबडी र दुई बाइडबडी जहाजको लागि लिएको ऋणको किस्ता बापतको केही रकम भुक्तानी गरेको छ।
एयरलाइन्सले कर्मचारी सञ्चय कोष र नागरिक लगानी कोषबाट ऋण लिएको थियो।
एयरलाइन्सका अनुसार ऋण दायित्वमध्ये दुई न्यारोबडी जहाजको २०८१ चैत महिनाको किस्ताबापत पूरा रकम र दुई वाइडबडी जहाजको आंशिक गरी रकम गरी चैत ३१ गते ५३ करोड ९ लाख ५५ हजार २८१ रूपैयाँ भुक्तानी गरेको हो।
हालसम्म निगममा नयाँ नेतृत्व आएपछिको अवधि (२०७८ साल यता) ७ अर्ब ३९ करोड ५ लाख ८ हजार ९५ रूपैयाँ किस्ता रकम भुक्तानी गरेको समेत बताइएको छ।
निगमले कोरोना महामारीको समयमा व्यवसयामा ठूलो समस्या परेको भन्दै किस्ता भुक्तानीमा सहजीकरण गर्न तथा किस्ता तिर्ने समय थप गर्न आग्रह पनि गरेको छ।
'विश्वव्यापी कोरोना भाइरसको कारण निगमको व्यापारमा परेको असर अवधिको ब्याज, ब्याजको ब्याज, हर्जाना र पेनल छुट गरी सहयोग गरिदिन एवं किस्ताको संख्या वृद्धि गरेर ऋण दायित्व भुक्तानीलाई सहजीकरण गरिदिन निगमले कर्मचारी सञ्चय कोष र नागरिक लगानी कोषलाई अनुरोध पत्र पठाएको छ। यस सम्बन्धमा छलफल समेत भइरहेको छ,' निगमले जारी गरेको विज्ञप्तिमा भनिएको छ।
