विद्युत नियमन आयोगले साउथ एसिया फोरम फर इन्फ्रास्ट्रक्चर रेगुलेसन (साफिर) अर्थात् दक्षिण एसियाली पूर्वाधार नियमन मञ्चको सदस्यता लिन स्वीकृति पाएको छ।
मंसिर ८ गते बसेको मन्त्रीपरिषद् बैठकले आयोगलाई सदस्यता लिन स्वीकृति दिने निर्णय गरेको हो।
क्षेत्रीय तथा अन्तर्राष्ट्रिय नियामक निकायहरूसँग अनुभव आदानप्रदान, उत्कृष्ट अभ्यासको अंगीकरण तथा नियामकीय सीप र क्षमता विकासको दृष्टिले साफिरको सदस्यता आयोगका लागि महत्वपूर्ण उपलब्धि हुने आयोगका अध्यक्ष रामप्रसाद धितालले बताए।
साफिरको सदस्यता प्राप्त गरेपछि आयोग तथा सरकारलाई निकै लाभ हुने आयोगले जनाएको छ।
खासगरी विद्युत क्षेत्रको सुधारका लागि आवश्यक हुने विविध नियामकीय अभ्यास सम्बन्धी जानकारी प्राप्त हुने विश्वास लिइएको छ।
योसँगै विभिन्न देशका नियामक संघसंस्था तथा निकायहरू बीच अनुभव तथा ज्ञान आदानप्रदान गर्न र ऊर्जा सम्बन्धी खोज अनुसन्धानलाई प्रोत्साहन गर्न सहज हुने अपेक्षा छ।
साथै, क्षमता अभिवृद्धि, उत्कृष्ट अभ्यास र ज्ञानको आदानप्रदान तथा प्राविधिक दक्षताको प्रवाहबाट मानव स्रोत क्षमतामा अभिवृद्धि हुने आयोगले जनाएको छ।
यसका लागि आयोगले सरकारलाई धन्यवाद समेत दिएको छ।
-1746009348.jpg)
