चालु आर्थिक बर्ष २०८२/८३ सुरु भएयता नै घरजग्गा कारोबारमा गिरावट आएको छ। अघिल्लो आर्थिक वर्षमा केही चलायमान देखिएको घरजग्गा कारोबार फेरि घटेको हो।
भूमि व्यवस्थापन तथा अभिलेख विभागबाट प्राप्त तथ्यांकअनुसार साउनमा कारोबारमा गिरावट आएको छ। २०८१ साउनमा नेपालभर ४३ हजार ८ सय ३५ वटा घरजग्गा कारोबार भएको थियो।
गत साउनमा भने ३१ हजार ६ सय २१ वटा मात्रै घरजग्गा कारोबार भएको छ। जुन गत आर्थिक वर्षको सोही महिनाको तुलनामा २८ प्रतिशतले कम हो।
गत असारको तुलनामा यो ४३ प्रतिशतले कम हो। गत असारमा देशभर ५५ हजार ५ सय २४ वटा कारोबार भएको थियो। गत आर्थिक वर्षभर नेपाल भरी पाँच लाख ९० हजार ५ सय ४३ वटा घरजग्गा कारोबार भएको थियो।
समीक्षा महिनामा काठमाडौं उपत्यकामा तीन हजार २० वटा घरजग्गाको कारोबार भएको छ।
साउनमा ललितपुरको लगनखेल मालपोत कार्यालयबाट ६ सय १६ र गोटीखेल मालपोत कार्यालयबाट ६ वटा मात्रै घरजग्गा कारोबार भएको छ। यस्तै भक्तपुर मालपोत कार्यालयबाट ८ सय २० वटा घरजग्गा कारोबार भएको देखिन्छ ।
यस्तै, डिल्लीबजार मालपोत कार्यालयबाट १ सय ६३, चाबहिलबाट ३ सय ६२, कलंकीबाट ४ सय ६६, मनमैजुबाट २ सय ४, साँखुबाट २ सय ६३ र टोखाबाट १११ घरजग्गाका कारोबार भएका छन्।
साउनमा भारी गिरावट आएको घरजग्गा कारोबार भदौमा पनि निराशाजनक रहेको व्यवसायीहरुले बताएका छन्।
लचिलो मौद्रिक नीति आएपछि घरजग्गा कारोबारमा उछाल आउने अपेक्षा गरेपनि कित्ताकाट रोकिँदा ठूलो समस्या आएको नेपाल जग्गा तथा आवास विकास महासंघका अध्यक्ष विष्णुप्रसाद घिमिरेले बताए।
उनकाअनुसार स्थानीय तहले जग्गा वर्गीकरण नगर्दा कित्ताकाट पनि हुन सकेको छैन। त्यसले घरजग्गा कारोबार प्रभावित भएको छ।
नेपाल जग्गा तथा आवास विकास महासंघका अध्यक्ष घिमिरेले भने–‘घरजग्गा कारोबारको अवस्था सबैतिरबाट बन्द भएको अवस्था छ। हामीले राष्ट्र बैंकको नीति आएपछि अलि उत्साहित भएका थियौं। तर कित्ताकाट बन्द भयो र झ्याप्पै कारोबाररोकियो।’
अध्यक्ष घिमिरेले घरजग्गा कारोबार प्रभावित हुनुमा आर्थिक शिथिलता पनि एउटा कारण रहेको बताए। सरकारले कित्ताकाट अब पनि नखुलाए अवस्था झन् भयावह हुने उनको भनाइ छ। - न्युज एजेन्सी नेपाल
-1746009348.jpg)
