दाउन्ने एग्रो फार्म लिमिटेडले गत आर्थिक वर्षमा १ अर्ब ५२ करोड ४६ लाख ९० हजार ८७६ रूपैयाँ बराबरको पोल्ट्री उत्पादन बिक्री गरेको छ।
आर्थिक वर्ष २०८०/०८१ मा यस कम्पनीले १ अर्ब २१ करोड ४२ लाख १९ हजार ७०१ रूपैयाँ बराबरको बिक्री गरेको थियो।
उक्त कम्पनीले गत आर्थिक वर्षमा ८ करोड १५ लाख ९० हजार रूपैयाँ नाफा गरेको अध्यक्ष बिनोद पोखरेलले जानकारी दिए।
पोखरेलकाअनुसार यो प्रतिशेयर १८.३७ रूपैयाँ आम्दानी हो। आर्थिक वर्ष २०८०/८१ मा प्रतिशेयर ३.६४ रूपैयाँ आम्दानी गरेको कम्पनीले यस वर्ष प्रतिशेयर आम्दानी बढाएको हो।
आर्थिक वर्ष २०८०/०८१ मा यस कम्पनीले २ करोड ६३ लाख ४७ हजार ८९७ रूपैयाँ नाफा गरेको थियो। सो वर्ष कम्पनीको चुक्ता पूँजी २७ करोड रूपैयाँ रहेकोमा गत आर्थिक वर्षमा बढेर ५० करोड पुगेको हो।
कम्पनीको कूल सम्पत्ति १ अर्ब ६६ करोड ९२ लाख ५४ हजार १७९ पुगेको जनाइएको छ। आर्थिक वर्ष २०८०/८१ मा कूल सम्पत्ति १ अर्ब ४० करोड ८९ लाख ३८ हजार १२ थियो।
आइतबार सम्पन्न आठौं वार्षिक साधारण सभाले प्रारम्भीक सार्वजनिक आव्हान (आइपिओ) मा जाने सम्बन्धी प्रस्ताव सर्वसम्मत अनुमोदन गरेको हो।
यसका लागि सबै कानुनी प्रक्रियाहरू पूरा गरेको अध्यक्ष पोखरेलले बताए।
कम्पनीले १२ करोड ५० लाख रूपैयाँ बराबरको आइपिओ जारी गर्ने तयारी गरेको छ।
शेयर निष्काशनका लागि सिटीजन्स् क्यापिटलसँग सम्झौता भएको पोखरेलले बताए।
पोखरेल नेपाल लेयर्स कुखुरा पालक संघको अध्यक्ष हुन्।
उनले दाउन्ने एग्रो फार्म लिमिटेडलाई सार्वजनिक कम्पनीका रूपमा स्थापित गर्ने प्रतिबद्धता व्यक्त गरे।
साधारणसभामा कम्पनीका सञ्चालक रघुनाथ भट्ट, हेमराज बडाल, विज्ञहरू चिकित्सकहरू डा.अनन्त दाहाल, डा.आशिष पोखरेल, वित्तीय सल्लाहकार ऋषिराम चालिसे, आध्यान्त फण्ड म्यानेजमेन्टका अध्यक्ष मनोज पौडेल, शेयरधनीका तर्फबाट माधवप्रसाद अर्यालले पोल्ट्री व्यवसायको अवस्थाको बारेमा बोलेका थिए।
दाउन्ने एग्रो फार्म लिमिटेड र यसका सहायक कम्पनीले लेयर्स कुखुराको अण्डा, कुखुरा, क्रेट, मल उत्पादन गरेर बिक्री गर्दै आएको छ।
कम्पनीले गत आर्थिक वर्षमा ५ लाख २९ हजार २५० पेटी (११ करोड ११ लाख ४२ हजार पाँच सय वटा) अण्डा उत्पादन गरी बिक्री गरेको थियो।
कम्पनीको नवलपरासी (बर्दघाट–सुस्ता पूर्व) विनयी त्रिवेणी गाउँपालिका–३ को सर्दीमा करिब ११ विगाहामा फैलिएको फार्ममा चार लाख कुखुरा रहेका छन्।
निकट भविष्यमै कुखुराको संख्या ६ लाख पुर्याउने लक्ष्य रहेको अध्यक्ष पोखरेलले बताए।
२०७४ मा स्थापना भएको यस कम्पनीमा सुरूवातमा एक लाख कुखुरा पालन गरिएको थियो।
दाउन्नेको फार्ममा जर्मन र मलेसियाबाट आयात गरिएको स्वचालित, अत्याधुनिक उपकरणको प्रयोग गरेर कुखुरा पालन गरिएको संस्थापक अध्यक्ष रघुनाथ भट्टले बताए।
-1754812957.jpeg)
-1746009348.jpg)
