सरकारले कारबाही गर्ने चेतावनी दिएपछि बक्यौता तिर्न अटेर गर्दै आएका कतिपय विमान कम्पनीले धमाधम रकम तिर्न थालेका छन्।
संस्कृति, पर्यटन तथा नागरिक उड्डयन मन्त्रालयले रकम नतिर्ने विमान कम्पनीलाई उडान र अवतरण रोक्ने चेतावनी दिएपछि उनीहरुले किस्ताबन्दीमा रकम तिर्न थालेका हुन्।
धेरै बक्यौता रहेको मलेसियन विमान कम्पनी एयर एशियाले मात्रै गत आइतबार नेपाल नागरिक उड्डयन प्राधिकरणलाई दुई करोड बुझाएको छ। एयर एशियाले यात्रुसँग उठाएको सेवा शुल्कसँगै विमानस्थललाई रकम तिर्न अटेर गर्दै आएको थियो।
प्राधिकरणका उपमहानिर्देशको नेतृत्वमा छानबिन समिति गठन गरेर बक्यौता तिर्न अटेर गर्ने कम्पनीलाई कारबाहीको तयारी गरेपछि धमाधम बोर्ड र प्राधिकरणलाई बुझाउनुपर्ने रकम तिर्न थालेका छन्। प्राधिकरणका प्रवक्ता वीरेन्द्रप्रसाद श्रेष्ठले लगातारको ताकेता र कारबाहीको चेतावनीपछि अटेर गर्दै आएका विमान कम्पनी धमाधम बक्यौता तिर्न थालेको बताए।
एयर एशियाले प्राधिकरण र बोर्डलाई किस्ताबन्दीमा रकम तिर्दै जाने प्रतिबद्धता जनाएको छ। कम्पनीले नेपाल पर्यटन बोर्डलाई ५२ लाख ५० हजार तिरेको छ। यस्तै प्राधिकरणलाई पनि किस्ताबन्दीमा रकम तिर्ने भन्दै कम्पनी सम्पर्कमा समेत आएको छ।
बोर्डका निमित्त निर्देशक रोहिणीप्रसाद थपलियाले बक्यौता रकममध्ये केही प्राप्त भएको जानकारी दिए। सो विमान कम्पनीले बोर्डलाई सात करोड २३ लाखभन्दा बढी रकम बुझाउन बाँकी छ। प्रतिपर्यटक एक हजारको दरले उठाएको रकम बोर्डलाई बुझाउनुपर्ने कानूनी व्यवस्था छ।
हाल बन्द रहेको भारतीय विमान कम्पनी किंगफिसरको पनि बक्यौता छ । उक्त कम्पनी हाल सम्पर्कभन्दा बाहिर रहेको बोर्डले जनाएको छ।
प्राधिकरणले बक्यौता तिर्न अटेर गर्दै आएका दुई दर्जन बढी वायु सेवा कम्पनीलाई समयमा नै रकम उपलब्ध गराउन ताकेता गरेको थियो । ताकेता गरेपछि केही विमान कम्पनीले बक्यौता रकम उपलब्ध गराएका छन् भने केहीले किस्ताबन्दीमा भए पनि रकम तिर्ने वचन दिएको प्राधिकरणले जनाएको छ।
एयर एशियाको मात्रै २३ करोड बक्यौता चुक्ता गर्न अटेर गर्दै आएको थियो। प्राधिकरणका अनुसार बक्यौता रकम नतिरे उडान बन्द गर्ने चेतावनी दिएपछि हालसम्म १२ करोड रकम उपलब्ध गराएको छ।
प्राधिकरणका अनुसार किस्ताबन्दीमा चुक्ता गर्ने सिम्रिक र सौर्य एयरलाइन्सले प्रतिबद्धता जनाएका छन्। छानबिन समितिको निर्देशनपछि त्रिभुवन विमानस्थलले मंसिर दोस्रो साता सार्वजनिक सूचना जारी गरी सबै वायुसेवालाई मंसिर मसान्तभित्र बक्यौता चुक्ता गर्न निर्देशन दिएको थियो।
हाल सञ्चालनमा रहेका एयरलाइन्सले ६६ करोड ३९ लाख ४६ हजार रकम तिर्न अटेर गरेका छन् । सरकारी कार्यालय तथा संघसंस्थाले समेत ५५ करोड १२ लाख २१ हजार तिरेका छैनन्। यस्तै, सञ्चालनमा नरहेका संघ र संस्था फार्मको दुई करोड ९७ लाख ५७ हजार र सञ्चालनमा रहेका संस्थाको १२ करोड ४५ लाख ८३ हजार बक्यौता देखिएको छ।
त्रिभुवन विमानस्थल भन्सार कार्यालय, नेपाल वायु सेवा निगम कार्यालयले समेत बाँकी रकम तिरेका छैनन्। भन्सार कार्यालयले ५५ करोड १२ लाख २१ हजार र निगमले ३२ करोड २१ लाख नौ हजार तिरेका छैनन्। यी दुई सरकारी निकायबाट मात्रै विमानस्थललाई ८७ करोड ३३ लाख ३१ हजार बक्यौता रकम प्राप्त हुन बाँकी छ । विमानस्थल कार्यालयले सञ्चालनमा नरहेका वायुसेवा कम्पनी र संघसंस्थाको रकम असुलीका लागि विमानस्थल कार्यालयले प्रक्रिया शुरू गरेको छ।
बन्द भएकालाई बक्यौता उठाउन केन्द्रीय तहसिलको कार्यालयले प्रक्रिया अगाडि बढाएको छ । सञ्चालनमा रहेकालाई कारबाही गर्ने चेतावनी दिँदै बक्यौता उठाउन लागिएको छ।
