नेकपा (एमाले) का केन्द्रीय सदस्य सोम मिश्रले आफू प्रतिनिधि सभा ब्युँताउने पक्षमा नरहेको बताएका छन्।
एमालेको २७, २८, २९ गते बस्ने केन्द्रीय कमिटी बैठकले प्रतिनिधि सभा ब्युँताउने विषयमा छलफल गर्दैछ।
केन्द्रीय सदस्य मिश्रले विघटित प्रतिनिधि सभालाई ‘नालायक’ को संज्ञा दिँदै यसलाई ब्युँताउनुपर्छ भन्ने पक्षमा आफू उभिन नसक्ने स्पष्ट पारेका हुन्। उनी भक्तपुरको चाँगुनारायण नगरपालिकाका पूर्वमेयर हुन्।
‘मैले पढेको, सुनेको र बुझेकोमध्ये इतिहासको सबैभन्दा नालायक थियो विघटित प्रतिनिधि सभा। आफ्नो तीन वर्षे कालमा गर्न पर्ने, गर्न नसकेको मात्र होइन लाजको पसारो हुने गरी दुनिया हँसाउने मात्र काम गर्न सक्यो,’ उनले टिप्पणी गरेका छन्।
उनले त्यसका १२ वटा दृष्टान्तसमेत प्रस्तुत गरेका छन्।
‘निजामती कर्मचारी विधेयक ल्याउन त सकेन सकेन, कुलिङ अफ पिरियडको खिचडा खेलले संसद् पदको गरिमा र संसदीय अभ्यासको खिल्ली उडायो, विद्यालय शिक्षा विधेयक, ......को के खेल जस्तो, नेपाल प्रहरी विधेयक असफल, सशस्त्र प्रहरी विधेयक असफल,’ उनले भनेका छन्।
उनले यसअघिको प्रतिनिधि सभाले कार्यपालिका माथिको नियन्त्रण र सन्तुलनको भूमिका निर्वाचन गर्न नसकेको मात्र होइन, कार्यपालिकाको रबर छाप मात्र बनेको आरोप लगाएका छन्।
‘ठूला ठूला भ्रष्टाचारका कान्डमा अन्देखा, देशमा व्याप्त भ्रष्टाचार र कुसाशनमा नियन्त्रणको सट्टा प्रोत्साहन, संसद आफै सेटिङमा व्यस्त, लाजलाग्दो असन्तुलित बजेट निर्माण, बजेट निर्माण जस्तो गम्भीर विषयमा विचौलियाको प्रवेश/भूमिका, त्यसलाई संसद्को अनुमोदन,’ उनले भनेका छन्।
त्यस्तै प्रतिनिधि सभामा निर्वाचित सांसदहरू भ्रष्टाचार, अनियमितता, घुसखोरी जस्ता काण्डमा कोही जेलमा, कोही अदालतको तारेखमा, कोही अख्तियारको बयानमा, कैयन् नैतिकताको प्रश्नमा परेको पनि बताएका छन्।
‘बारबार सरकार र समीकरण बदल्ने बाहेक राम्रो त यो प्रतिनिधि सभाले गरेन नै, लाज लजाउने कामहरू धेरै गर्यो, देश बचाउन सकेन, संविधान जोगाउन सकेन, राज्यविहीनता अवस्था व्यवस्थापिका/कार्यपालिका/न्यायपालिकाविहीनको अवस्थामा नेपालीलाई यही संसद्ले पुर्यायो। प्रतिनिधि सभा संविधानलाई कुल्चेर विघटन भएको २५ दिनसम्म सभामुख बाहेक कोही बोल्न सकेन, सडकमा आउने त कुरै थिएन, किनकि त्यो लोकप्रिय नारा थिएन/छैन,’ उनले भनेका छन्, ‘आफैलाई बचाउन नसकेको प्रतिनिधि सभाले देशको बर्बादीको लागि गरेको कामको लामै सूची होला, राम्रा कामको एउटा पनि बीउ भेटिन मैले र म व्यक्तिगत रूपमा यही असक्षम, नालायक र राष्ट्रलाई बर्बादीको अवस्थामा पुर्याउन भूमिका खेल्ने प्रतिनिधि सभा ब्युँताउनुपर्छ भन्ने पक्षमा छैन,’ उनले भनेका छन्।
-1746009348.jpg)
