प्राथमिक सेयर निष्कासन (आइपिओ) सहजीकरणको लागि कमिसन मागिएको विषयमा तथ्यगत प्रमाण र आधिकारिक धारणा पेस गर्न भन्दै नेपाल धितोपत्र बोर्डले स्वतन्त्र ऊर्जा उत्पादक संस्था (इप्पान)लाई पत्राचार गरेको छ।
सञ्चालक समितिको बैठकको निर्णय अनुसार इप्पानलाई यसरी पत्राचार गरिएको धितोपत्र बोर्डका प्रवक्ता निरञ्जय घिमिरेले पुष्टि गरे।
इप्पानले पठाउने तथ्यगत प्रमाण र आधिकारिक धारणापछि संलग्नहरूलाई कानुनी प्रक्रिया अनुसार कारबाही अघि बढाउने बोर्डले उल्लेख गरेको छ।
इप्पानमा गत मंगलबार बसेको बैठकमा जलविद्युत कम्पनी प्रवर्द्धकहरूले धितोपत्र बोर्ड अध्यक्षको नाममा केहीले सेयर निष्कासन प्रक्रिया मिलाइदिने भन्दै कमिसन मागिएको बताएका थिए।
उनीहरूले सेयर जारी गर्न लागिएको रकमको ५ देखि ७ प्रतिशतसम्म कमिसन मागिएको दाबी गर्दै इप्पानमा गुनासो गरेका थिए।
बुधबार अख्तियार दुरूपयोग अनुसन्धान आयोगका केही प्रतिनिधिहरू बोर्डमै पुगेर सेयर निष्कासन प्रक्रियामा रहेका कम्पनीहरूको अवस्था बुझेका थिए।
बोर्डबाट सेयर निष्कासनको प्रक्रियामा रहेका कम्पनीहरूको सूचीसहित करिब ७ पानाको विवरण आयोगले लिएको थियो।
