नेपाली राष्ट्रिय क्रिकेट टिमका कप्तान पारस खड्काले आगमी आइतबार अर्थात जुलाई २९ मा लर्ड्स क्रिकेट मैदानमा हुने नेपाल एमसीसी र नेदरल्याण्ड बिच हुने त्रिकोणात्मक टी २० क्रिकेट प्रतियोगितामा हेर्न बेलायतस्थित नेपाली समुदायमा आव्हान गरेका छन्।
मंगलबार लन्डन दूतावासमा आयोजित क्रिकेट टोलीको स्वागत समारोहमा बोल्दै खड्का बेलायतमा रहने सबै नेपालीलाई आफ्ना साथीभाई तथा परिवारको साथमा उपस्थित भएर नेपाली क्रिकेटको हौसला बढाउन अनुरोध गरे। ‘त्यो दिन लन्डनको लर्ड्स क्रिकेट मैदान नेपालीहरूको उपस्थितिले भरौं', खड्काले भने।
उक्त दिन समग्रमा नेपाल र नेपाली क्रिकेटलाई विश्व समुदाय सामु प्रदर्शन गर्ने अवसर भएको भन्दै उनले खेल प्रदर्शनमा प्रतिक्षारत रहेको समेत बताए।
कार्यक्रममा बेलायतका लागि नेपाली राजदूत दुर्गा बहादुर सुवेदीले नेपाली क्रिकेटरलाई दूतावासमा स्वागत गर्न पाउँदा हर्षानुभूत भएको बताए।
राजदूत सुवेदीले बेलायतवासी सम्पूर्ण नेपालीलाई नेपाल र नेपालीको परिचय र पहिचान तथा नेपाली क्रिकेटरको हौसला बढाउन जुलाई २९ मा लर्ड्स आउन आव्हान गरे। ‘सगरमाथा, बुद्ध र गोर्खाको देश भनेर चिनिने नेपाल अब उत्कृष्ट क्रिकेटको देशको समेत चिनारी बन्दै गएको छ’, राजदूत सुवेदीले भने।
सुवेदीले नेपाल बेलायत सम्बन्ध प्रगाढ बनाउन क्रिकेटको भूमिका बढ्दै गएको समेत चर्चा गरे।
बेलायतमा हुने अपाङ्गता सम्बन्धी उच्च शिखर सम्मेलनमा भाग लिन आएकी नेपाल सरकारकी महिला, बालबालिका तथा जेष्ठ नागरिक मन्त्री थम माया थापाले कार्यक्रमलाई सम्बोधन गर्दै नेपाली क्रिकेट टोलीलाई शुभकामना दिईन्।
उनले नेपाल बेलायत ऐतिहासिक सम्बन्धको चर्चा गर्दै वर्तमान नेपाल सरकारको विकास र सम्वृद्धिको अभियानमा साथ दिन सबै गैर आवासीय नेपालीलाई आव्हान समेत गरिन्।
बेलायत भ्रमणमा रहेका सांसद सूर्य पाठकले नेपाललाई चिनाउने माध्यम क्रिकेट बन्दै गएको धारणा राख्दै शुभकामना व्यक्त गरे।
कार्यक्रममा बोल्दै एमसीसीका 'हेड अफ क्रिकेट' जोन स्टेफेन्सनले नेपाली क्रिकेट टोलीलाई एमसीसीमा दोस्रो पटक स्वागत गर्न पाएकोमा खुशी व्यक्त गरे। साथै उनले नेपाली क्रिकेटको उत्थान र विकासमा एमसीसीले आगामी दिनमा सहयोग गर्ने योजना समेत रहेको बताए।
त्यसैगरी नेपालका लागि बेलायतका पूर्व राजदुत एन्ड्रु स्पार्क्सले नेपालको परिप्रेक्षमा क्रिकेटको उपलब्धिको प्रशंशा गरेका थिए।
कार्यक्रममा नेपाली क्रिकेट टिमका सम्पूर्ण खेलाडी तथा अधिकारी हरुलाई सम्मान गरिएको थियो।
कार्यक्रममा गायिका सरु थापा तथा गायक सपन राईले नेपाली गीतको प्रस्तुति दिएका थिए ।
