गैरआवासीय नेपाली संघ (एनआरएनए) का अध्यक्ष बद्री केसीले गैरआवासीय नेपाली अभियानलाई एकताबद्ध बनाउन आफूहरू सहमतिको नजिक पुगेको दाबी गरेका छन्।
एनआरएनए डेको अवसर पारेर आज आयोजित पत्रकार सम्मेलनमा बोल्दै अध्यक्ष केसीले संघ भित्रको विवादलाई अन्त्य गर्न विभिन्न तरिकाले वार्ता र छलफल भइरहेको समेत बताए।
'संस्थाको वैधानिक सर्वोच्चता कायम गर्दै यसलाई एकताबद्ध रूपमा अघि बढाउने उद्देश्यका साथ हामीले गैरआवासीय नेपाली अभियानमा फरक धारमा रहनुभएका साथीहरूलाई समेत समाहित गर्न अधिकतम लचकता अपनाउँदै बृहत् एकताको वातावरण तयार पार्न प्रयासरत छौं,' उनले भने, 'हामी विगत केही दिनदेखि लगातार वार्तामा छौं। केही समय अघिसम्म पनि म साथीहरूसँग छलफलमै थिएँ। हामी छिट्टै सहमतिमा पुग्छौं भन्नेमा म आशावादी छु।'
११ औं महाधिवेशनबाट निर्वाचित कार्यसमितिको नेतृत्व बद्री केसीले गरेका छन् भने गत वैशाखमा भएको एकता महाधिवेशनबाट निर्वाचित कार्यसमितिको नेतृत्व महेश श्रेष्ठले गरेका छन्।
एनआरएनए अध्यक्ष केसीले छलफलका क्रममा अभियानको फरकधारमा रहेकाहरूले गत वैशाखमा गरेको महाधिवेशनको संरचनालाई अभिलेखीकरण गर्ने र ११ औं महाधिवेशनबाट निर्वाचित कार्यसमितिको सहमतिमा ५ सदस्यीय स्टेरिङ कमिटी गठन गरी उक्त कमिटीले आगामी ३ महिनाभित्र नियमित १२ औं महाधिवेशन सम्पन्न गर्ने सहमतिको नजिक पुगेको बताए।
सर्वाधिकार सम्पन्न उक्त कमिटी मार्फत एमआइएस प्रणाली पुनः खुला गर्ने लगायतका सहमतिका बुँदाहरू प्रस्तावित भएकोमा धेरैमा सहमति भएको उनले बताए ।
'अबको योजना १२ औं महाधिवेशनको तयारी गर्ने, गैरआवासीय नेपाली संघलाई संस्थागत रूपमा अझ सबल, समावेशी र उत्तरदायी बनाउने दिशामा केन्द्रित हुने छ,' उनले भने, 'विवाद देखिएका केही राष्ट्रिय समन्वय परिषद् (एनसिसी) हरूमा एकता कायम गर्न पारस्पारिक सम्बादका आधारमा प्रक्रिया अघि बढाइनेछ।'
गैरआवासीय नेपाली संघले आफ्नो स्थापनाको २२ औँ वर्षगाँठ मनाइरहँदा स्थापना कालदेखिका माग तथा मुद्दाहरू क्रमशः सम्बोधन हुने क्रम जारी रहेको उनको दाबी छ।
यसबीचमा सबैभन्दा ठूलो उपलब्धी अर्थात विदेशमा बस्ने नेपालीका लागि सरकारले गैरआवासीय नेपाली नागरिकता प्राप्त गर्ने कानूनी बाटो खोलेको छ र पूर्ण कार्यान्वयनका लागि संघ प्रयासरत रहेको उनले बताए।
गैरआवासीय नेपालीहरूले विकास र पूर्वाधार निर्माणका क्षेत्रमा पनि आफ्नो उपस्थिति बढाउँदै लगेको भन्दै केसीले नेपालका जलविद्युत, बैंकिङ, पर्यटन, स्वास्थ्य, शिक्षा लगायतका क्षेत्रमा गैरआवासीय नेपालीको उल्लेख्य लगानी भित्रिरहेको र आर्थिक लगानी मात्रै नभएर बौद्धिक लगानी भित्र्याउन पनि संघले संस्थागत प्रयास जारी राखेको बताए।
-1746009348.jpg)
