अस्ट्रेलियामा नेपालीलाई सघाउने 'भेट्छ एप', के के छन् सुविधा?

सन्जिब बगाले

काठमाडौं, वैशाख ३१

चितवनका नवीन सापकोटा सन् २०१४ मा अस्ट्रेलिया गए। त्यो विकसित मुलुकमा पुगेपछि उनले कोठा खोज्ने, यात्रा गर्ने, सवारी चालक लाइसेन्स लिने लगायत थुप्रै काममा अनेक समस्या भोग्नुपर्‍यो।

समस्या पार लाग्दै जान्छ। समयको अन्तरालमा विगतमा भोगेको समय विस्मृतिमा जान थाल्छ। नवीन पनि समस्या पार लगाउँदै अघि बढे तर आफूले भोगेको हैरानी बिर्सिएनन्। आफूले झैं अरूले पनि अनेक समस्या भोगेका हुन सक्छन् भन्ने ठाने।

उनले आफूले भोगेका जस्ता समस्या समाधानमा सघाउने गरी काम गर्ने विचार गरे।

उनले अस्ट्रेलियामै पढेर नेपालमा आइटी क्षेत्रमा काम गरिरहेका निराजन कँडेलसँग र अमेरिकामा रहेका आशिष पंगेनीसँग कुरा गरे। दुवै जनालाई आफ्नो विचार सुनाए।

उनको विचारसँग निराजन र आशिष सहमत भए। तीन जना मिलेर एउटा योजना बनाए, दैनिक जीवनमा आवश्यक सबै सूचना एकै ठाउँमा भेट्न सकिने गरी एउटा एप बनाउने।

योजना अनुसार काम सुरू भयो। यसरी तीन महिनाअघि उनीहरूले 'भेट्छ एप' प्रयोगमा ल्याएका छन्।

नवीन यसको मार्केटिङसँगै अस्ट्रेलियामा हुने कामको सबै पक्ष हेर्छन्। अमेरिकामा रहेका आशिष कम्प्युटर इञ्जिनियर र नेपालमा रहेका निराजन आइटी इञ्जिनियर हुन्। तीन जनाले जिम्मेवारी बाँडफाँट गरेका छन्।

'मलाई सुरुमा अस्ट्रेलियामा कोठा पाउन निकै समस्या भयो। नेपाली समुदायमा हुने कार्यक्रमका र नेपाली दूतावासका सूचना पाउन गाह्रो भयो,' नवीनले भेट्छ एप विकासको पृष्ठभूमि सुनाए, 'त्यही समस्याबाट सबै सूचना एकै ठाउँमा पाउने एउटा प्लेटफर्म चाहिन्छ भन्ने सोच आयो। यो एप हामी तीन जनाले परिकल्पना गरेका हौं।'

हाल भेट्छ एप अमेरिकामा र अस्ट्रेलियामा सुरू भएको छ। चाँडै क्यानडा, बेलायत र न्युजिल्यान्ड पुर्‍याउने गरी काम हुँदैछ। आगामी दुई वर्षभित्र नेपालीहरूको संख्या धेरै रहेका अधिकांश देशमा विस्तार गर्ने उनीहरूको लक्ष्य छ।

नवीनका अनुसार 'भेट्छ एप' मा नेपालीलाई चाहिने सबै महत्त्वपूर्ण सूचनाहरू राखिन्छ। अस्ट्रेलियामा हुने सबै खालका गतिविधिको जानकारी पनि राखिन्छ।

'कसैलाई कोठा, कसैलाई जागिरको सूचना, कसैलाई दूतावासको सेवा चाहिएको हुन सक्छ,' उनले भने, 'भिसाको समय सकिन लाग्दा गर्नुपर्ने तयारी, पासपोर्ट नवीकरणको प्रक्रिया लगायतका जानकारी दिन्छौं।'

'भेट्छ एपमा अस्ट्रेलियाभरि छरिएर रहेका नेपालीलाई आइपर्न सक्ने समस्याको समाधानका लागि गर्न सकिने उपायबारे जानकारी दिइन्छ। अस्ट्रेलियामा रहेका नेपाली दूतावास र वाणिज्यदूतको कार्यालयले जारी गर्ने सूचनाहरू यसमै भेटिन्छन्।

अस्ट्रेलिया पुगेपछि नेपाली विद्यार्थीले सुरूका दिनदेखि त्यहाँको स्थायी आवास अनुमतिपत्र लिँदासम्म अनेक समस्याहरू भोगेका हुन्छन्। भाषाको कठिनाइ लगायतले पनि अन्योल भएको हुन सक्छ। कानुनी अड्चन बेहोर्नुपर्ने हुन सक्छ। व्यवसाय गर्नेहरूले सुरूआतको प्रक्रिया थाहा नपाएका हुन सक्छन्। कतिले करबारे जानकारी नपाउँदा झन्झट बेहोर्नुपरेको हुन सक्छ। स्वास्थ्य उपचारका लागि नेपाली चिकित्सकसँग पहुँच नपुग्न सक्छ।

नेपालीहरू अस्ट्रेलिया पुगेपछि मोबाइल फोनको सिमकार्ड लिने र बैंक खाता खोल्ने विषयमा जानकारी नपाएर पनि हैरान भएका हुन सक्छन्। अस्ट्रेलियामा बसिरहेका र भर्खरै पुगेका युवतीहरूले विभिन्न हिंसा भोगेका हुन सक्छन्। यस्ता पीडितहरूले समस्या सुनाउने उपयुक्त व्यक्ति नभेटेका हुन सक्छन्।

भेट्छ एपले यी सबै विषयमा जानकारी दिन्छ, उपाय सुझाउँछ।

'अस्ट्रेलियामा सामाजिक सञ्जालमार्फत विभिन्न समस्या बाहिर ल्याइन्छ तर समाधानबारे कतैबाट जानकारी पाइँदैन,' नवीनले भने, 'हामी समस्या समाधानका उपयुक्त उपाय र त्यस सम्बन्धी आधिकारिक सूचना दिन्छौं।'

नेपालीहरू रमाइलोका लागि समुद्रमा जान्छन् तर धेरैलाई समुद्री सुरक्षाबारे जानकारी हुँदैन। भेट्छ एपले यस सम्बन्धी जानकारी पनि दिन्छ।

'यो एपलाई हरेक नेपालीले आफूलाई आवश्यक र आफ्नो जिज्ञासाको सूचनास्रोत बनाऊन् भन्ने हाम्रो लक्ष्य छ,' नवीनले भने, 'सुरू गरेको तीन महिना मात्रै भएको छ। यसलाई विस्तार गर्दै लैजान्छौं।'