ग्लोबल नेपाली
मोरङको विराटनगरका प्रवेश रिजाल १२ कक्षा पास गरेर सन् २००८ मा अस्ट्रेलिया गएका थिए। उतै अर्थशास्त्र विषयमा स्नातक तहको पढाइ पूरा गरे।
उनी अस्ट्रेलियाबाटै 'स्टुडेन्ट एक्स्चेन्ज प्रोग्राम' अन्तर्गत अमेरिका पुगे। त्यहाँ 'समर स्कुल' भर्ना भए। त्यहाँको पढाइ पूरा भएपछि उनी अस्ट्रेलिया फर्केनन्।
'वाल स्ट्रिट बैंकर' बन्ने महत्त्वाकांक्षाका साथ न्यूयोर्क विश्वविद्यालयमा वित्तीय इञ्जिनियरिङ विषय लिएर स्नातकोत्तर तहमा भर्ना भए। यो तहको पढाइ पूरा भयो।
आफ्नो महत्त्वाकांक्षा अनुसार बैंकमा जागिरे भए। हाल उनी अमेरिकाको न्यूजर्सीस्थित क्रस रिभर बैंकमा लगानी रणनीति प्रमुखका रूपमा काम गर्छन्।
'म १२ वर्षदेखि अमेरिकाको बैंकिङ क्षेत्रमा काम गर्दै छु। मेरो मुख्य जिम्मेवारी लगानी रणनीति बनाउने हो,' प्रवेशले भने।
उनको विभागले वित्तीय प्रविधि (फिनटेक) सम्बन्धी कम्पनीहरूलाई पुँजी बजारसँग जोड्न मद्दत गर्छ। गणित र वित्तको माध्यमबाट पुँजी बजारको अनुमान गर्दै बैंकको पुँजी लगानी सम्बन्धी निर्णय गर्छ।
'क्रेडिट बुक लिने र त्यसको फाइनान्सियल इञ्जिनियरिङ गरेर इन्स्योरेन्स फन्ड बेच्ने हाम्रो मुख्य काम हो,' उनले भने, 'हामी कस्तो खालको लोन पोर्टफोलियो कतिमा बेच्ने भनेर रणननीति बनाउँछौं। कस्तो खालको लोन बजारमा आएको छ, त्यो कतिमा किन्नुपर्छ, कसरी किन्नुपर्छ भन्ने निर्णय गर्छौं।'
लगानीकर्ता खोज्ने र लोन बेच्ने काम उनको विभागको हो। बैंकसँग भएको लोन बुकको आधारमा कुन ठाउँमा बेच्ने, त्यसको जोखिम कति हो अनि कसलाई दिने र कसलाई नदिने भनेर अन्तिम निर्णय उनकै विभागले गर्छ।
प्रवेशको विभागको काम निकै चुनौतीपूर्ण छ, जोखिम पनि त्यत्तिकै छ।
'बैंकमा काम गर्नु चुनौतीपूर्ण र रमाइलो दुवै छ। मार्केटिङको पाटो भएकाले गाह्रो पनि छ, प्रतिस्पर्धा धेरै छ,' उनी भन्छन्, 'आफ्नो रोजाइको पेसामा काम गर्न पाएकाले मलाई रमाइलो भएको छ। नयाँ अनुभव र ज्ञान लिन पाएको छु।'
उनले अमेरिकाको बैंकिङ क्षेत्रमा काम सुरू गर्दा उनीजस्ता नेपाली निकै कम थिए। अहिले संख्या बढ्दै गएको उनको भनाइ छ। बैंकमा पनि विशेषज्ञताका क्षेत्र धेरै हुन्छन्। आफ्नो इच्छा र क्षमता चिनेर निर्णय लिनुपर्छ।
हाल उनी फ्रान्सको इडिएचइसी बिजनेस स्कुलबाट वित्तीय इञ्जिनियरिङमा विद्यावारिधि गर्दै छन्।
