बलिउड उद्योगका उत्कृष्ट अभिनेता मध्येका एक शाहरुख खान पछिल्लो पटक सन् २०१८ मा रिलिज भएको फिल्म जिरोमा देखिएका थिए।
त्यसयता उनी कुनै फिल्ममा देखिएनन्। तर, आगामी वर्ष सन् २०२३ मा शाहरूख खानका उक साथ तीन फिल्म रिलिज हुँदैछन्। जसको फ्यानहरू उत्सुकतापूर्वक प्रतिक्षा गरिरहेका छन्।
हाल शाहरूख खान लण्डनमा आफ्नो आगामी फिल्म ‘डंकी’ को सुटिङमा व्यस्त छन्। उनको फिल्मको सेटको एउटा तस्बिर सामाजिक सञ्जालमा भाइरल भइरहेको छ। जसलाई शाहरुख खानको फ्यान पेजबाट शेयर गरिएको छ।
जसमा उनी क्याजुअल लुकमा देखिएका छन्। यस फोटोमा शाहरुख खानले चेक शर्ट र ट्राउजर लगाएका छन् र उनी दाह्रीमा देखिएका छन्। सेटमा उनको वरिपरि चालक दलका सदस्यहरू देखिन्छन्। शाहरुख खानको तस्बिर भाइरल भएपछि फ्यानहरूले उनको लुकलाई निकै मन पराइरहेका छन् र प्रशंसामा कमेन्ट पनि गरिरहेका छन्।
बेलायत र युरोपमा फिल्म डंकीको सुटिङपछि शाहरूख खान भारत आउने र पञ्जाबमा सुटिङ गर्ने बताइएको छ।
सन् २०२३ मा उनको तीन वटा फिल्म ब्याक टू ब्याक रिलिज हुन लागेका छन्। उनी सिद्धार्थ आनन्दको फिल्म ‘पठान’ मा दीपिका पादुकोण र जोन अब्राहमसँग देखिनेछन्। उक्त फिल्म २५ जनवरीमा रिलिज हुँदैछ।
यस्तै एट्लीको फिल्म ‘जवान’ मा उनी नयनतारासँग देखिनेछन्। उक्त फिल्म जुन २ मा रिलिज हुँदैछ।
यस्तै राजकुमार हिरानीको फिल्म ‘डंकी’ मा तापसी पन्नुसँग देखिनेछन्। यो फिल्म २२ डिसेम्बरमा रिलिज हुनेछ।
