चर्चित गायक रामकृष्ण ढकालको निर्माणमा बन्न लागेको फिल्म 'मालती मंगले' को भदौ दोस्रो साताबाट छायांकन सुरू गर्ने तयारी छ।
फिल्मको छायांकनको तयारी स्वरूप हाल काठमाडौंमा कलाकारहरूका लागि कार्यशाला (वर्कसप) सञ्चालन भइरहेको छ।
फिल्मका पटकथा तथा संवाद लेखक संयोग गुरागाईँको संयोजनमा वर्कसप सञ्चालन भइरहेको हो। वर्कसपमा अभिनेता विजय बराल, अभिनेत्री वर्षा राउत, सुवर्ण थापा, मेक्सम गौडेल, प्रकाश घिमिरे, सरिता गिरी, सुस्मा निरौला, सुनील तामाङ, उमेश सुनाम, शकु शाह, सुचित्रा उप्रेती, दिनेश जंग ठकुरी, रिजन परियार, सागर भट्टराईलगायत कलाकारहरू सहभागी छन्।
वर्कसपको क्रममा अभिनेता विजय बरालले फिल्मले नेपाली समाजको यथार्थ जीवनका कथालाई रोचक तरिकाले प्रस्तुत गर्ने विश्वास व्यक्त गरे।
उनले भने, 'पात्रलाई अझै नजिकबाट बुझ्न यो वर्कसपले ठूलो मद्दत पुर्याएको छ। दर्शकले आफ्नो कथा पर्दामा देखेझैँ अनुभूति गर्नेछन्।'
यसैगरी अभिनेत्री वर्षा राउतले वर्कसपलाई आफूलाई पात्रमा ढाल्ने अवसरका रूपमा लिएको बताइन्। उनले भनिन्, 'यो फिल्म पारिवारिक भावनासँग जोडिएको छ। वर्कसपमार्फत पात्रको गहिराइमा पुग्ने अवसर पाइरहेकी छु।'
'मालती मंगले' प्रकु पाण्डेयले निर्देशन गर्नेछन्। कथा पाण्डेय स्वयंले लेखेका हुन् भने पटकथा तथा संवाद गुरागाईँले तयार पारेका छन्। फिल्मको छायांकन तनहुँ र स्याङ्जा जिल्लाका विभिन्न भूभागमा हुने कार्यकारी निर्माता सागर ज्ञवालीले जानकारी दिए।
रानी म्युजिक इन्टरनेशनल प्रा.लि.को ब्यानर र युनी इन्टरटेनमेन्टको सहकार्यमा फिल्म बन्न लागेको हो। सह–निर्माता रविन श्रेष्ठ र बाबु सुवेदी, छायांकन निर्देशक महेश पौडेल, सम्पादक रोमी तण्डुकार, रंग संयोजक कृष्ण भण्डारी, गीतकारहरू राजेन्द्र थापा, आनन्द अधिकारी, गोपाल अधिकारी र संगीतकारमा हरि लम्साल, राजनराज सिवाकोटी र उज्ज्वल सागर छन्।
निर्देशक पाण्डेयका अनुसार 'मालती मंगले' पारिवारिक प्रेमकथामा आधारित हुनेछ।
-1746009348.jpg)
