दुर्गेश थापाले फिल्म 'कर्मा' का लागि गीत गाएका छन्।
पछिल्लो समय 'दुश्मन हेरेको हेर्यै' गीतबाट निकै चर्चामा रहेका दुर्गेशले सौरभ चौधरीको लेखन तथा निर्देशन रहेको फिल्मका लागि गीत गाएका हुन्।
यही चैत २९ गतेदेखि प्रदर्शनमा आउने फिल्ममा विपिन कार्की र उपासना सिंह ठकुरीको मुख्य अभिनय छ।
केही दिनअगाडि दुर्गेशले रेकर्ड गरेको गीतको आइतबार भिडिओ छायांकन भएको छ।
दुर्गेशको गीत फिल्मभित्रै समावेश हुने बताइएको छ। दुर्गेशले गाएको गीतमा फिल्मका मुख्य कलाकार विपिन र उपासनासहित मुकुन भुसाल लगायतको अभिनय रहने बताइएको छ। निर्माणपक्षका अनुसार केही दिनमा उक्त गीत सार्वजनिक हुनेछ।
यस्तै, निर्माणपक्षले सोमबार बेलुका गायक सुशान्त केसीको आवाजमा रहेको 'पागल पागल जस्तै' बोलको गीत सार्वजनिक गर्दैछ।
फिल्म 'कर्मा' मा विपिन, उपासना मुकुनसँगै दिब्यदेव, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय छ। आर्टिस्टिक इन्टरटेन्मेन्टको प्रस्तुति रहेको फिल्मको निर्माता वसन्त लम्साल हुन्।
