'रूकुम मैकोट' बोलको गीतले युट्युबमा लोभलाग्दो भ्युज पाइरहेको छ।
एसडी योगी र शान्तिश्री परियारको स्वर रहेको लोकलयको यो गीतको युट्युब भ्युज दुई महिनाको छोटो समयमै ५ करोड नाघेको छ।
मंगलबारसम्म भिडिओलाई ५ करोड ५ लाख पटक हेरिएको छ। पछिल्ला दिनमा पनि भ्युजको रफ्तार घटेको छैन।
गीत लामो समयदेखि युट्युबको ग्लोबल ट्रेन्डिङमा समेत छ।
अगस्ट २५ मा रिलिज 'रूकुम मैकोट' फिल्म 'खुस्मा' को गीत हो। यसको भिडिओमा फिल्मका शीर्ष कलाकार धिरज मगर र उपासना सिंह ठकुरी फिचर्ड छन्। एसडी योगीद्वारा संगीतबद्ध गीतका शब्द सुरेन्द्र रानाका हुन्।
गीत रूचाइनुमा लोकलय, मनछुने शब्द, संगीत र स्वरसँगै सुहाउँदो कोरियोग्राफीलाई मानिएको छ।
रिलिज हुनासाथ रूचाइएको गीतमाथि फेसबुक रिल्स र टिकटक भिडिओ बन्न थालेसँगै यसको चर्चा र युट्युब भ्युज पनि ह्वात्तै बढ्दै गयो।
गीतले असोज ३ मा रिलिज फिल्मको व्यवसायमा समेत फाइदा पुर्याएको विश्लेषण गरिएको छ। अशोक थापा मगर निर्देशित 'खुस्मा' बक्स अफिसमा हिट भइसकेको छ।
