समकालीन २० युवा स्रष्टाका कथा समेटिएको संग्रह ‘छकालै’ बजारमा आएको छ। बुधबार सार्वजनिक गरिएको पुस्तकमा पछिल्लो दशक साहित्यमा सक्रिय रहेका युवा कथाकारका २० थान कथा समावेश छन्।
संग्रहका सम्पादक नवीन प्यासीका अनुसार, 'छकालै’ आख्यान लेखनमा प्रयास गरिहरहेका नयाँ पुस्ताको प्रतिनिधि आख्यान–अनुहार हो। उनी भन्छन्, ‘यो संग्रहमा हामीले आफ्नो समयको चेतना र भाषाशिल्प प्रयोग गरेर कथा लेख्ने प्रयास गरेका छौं।’
कथाकार संगीत मगरका अनुसार संग्रहले युवा मनोविज्ञानका कथासँगै युवाजीवनले भोग्नुपरेका साझा समस्या बोलेको छ। उनी भन्छिन्, ‘नयाँ पुस्ता के कारणले नयाँ छ भन्ने आयाम ‘छकालै’ ले उठाएको छ।’
‘कथा लेख्नु साहित्य कर्ममात्र होइन, युगको आवाज बोल्ने माध्यम हो’ अर्का कथाकार निर्भीकजंग रायमाझीले भने ‘यसैले व्यक्तिगत सृजनाको संग्रह भएपनि नयाँ समयको साझा चेतना हाम्रा कथा पाइन्छ।’
संगीत र नवीनसँगै संग्रहमा अनिल वान्तवा, अन्जना इछमफूल, अन्शु खनाल, अन्वेश थुलुङ, बाबु साहेब, विकास, दीपा मेवाहाङ राई, देव व्रत, खेम बतास, कृष्णप्रसाद अर्याल, कुन्साङ, मनोज विश्वकर्मा, नदीश, निमेषराज सापकोटा, निर्भीकजंग रायमाझी, प्रज्वल अधिकारी, समर्पण श्री र सागर चन्दका कथा छन्।
इन्डिगो इन्कले प्रकाशन गरेको संग्रहको मूल्य ३ सय ९९ रहेको छ। संग्रह ‘किताब यात्रा’ तथा ‘थुप्रै डटकम’ अनलाइनबाट समेत खरिद गर्न सकिने प्रकाशक विष्णुकुमारले जनाएका छन्।
-1746009348.jpg)
