सिद्धार्थ बैंक नेपाल प्रिमियर लिग (एनपिएल) मा मार्क वाटको उत्कृष्ट शतकमा कर्णाली याक्सले लुम्बिनी लायन्समाथि ९ विकेटको सानदार जित निकालेको छ।
वाटले शकक प्रहार गरेछि लुम्बिनीले दिएको १५७ रनको लक्ष्य कर्णालीले १२.२ ओभरमै एक विकेटको क्षतिमा पूरा गर्यो।
उत्कृष्ट लयमा देखिएका वाटले ४४ बलमा ६ चौका र १२ छक्का प्रहार गर्दै नटआउट ११४ रन बनाए। विल बोसिस्टोले २० बलमा नटआउट २९ रन जोडे। उनले २ चौका र एक छक्का प्रहार गरे।
वाटले दशौं ओभरमा लुम्बिनीका कप्तान रोहित पौडेलविरूद्ध २६ रन प्रहार गरेका थिए। सो ओभरमा उनले चार छक्का र एक पटक दुई रन लिएका थिए।
वाटले यो सिजनको एनपिएनमा पहिलो शतक प्रहार गरेका हुन्। अघिल्लो सिजन पोखराका लागि आन्द्रेस गौसले लुम्बिनी लायन्स विरूद्ध नै १०४ रन प्रहार गरेका थिए।
एनपिएलमा वाट सर्वाधिक छिटो शतक पूरा गर्ने ब्याटर बने। उनले ४१ बलमै शतक पूरा गरे। अघिल्लो सिजन गौसले ५४ बलमा शतक प्रहार गरेका थिए।
साथै वाटले एनपिएलकै एकै इनिङग्समा सर्वाधिक छक्का (१२) प्रहार गर्ने कीर्तिमान पनि बनाए। यस्तै उनले एनपिएलको एकै इनिङग्समा सर्वाधिक रन (नटआउट ११४) पनि रेकर्ड राखे।
२९ वर्षीय वाट स्कटल्यान्डको राष्ट्रिय टोलीका खेलाडी हुन्। इडनवर्गमा जन्मिएका वाटले सन् २०१५ मा राष्ट्रिय टोलीमा डेब्यू गरेका थिए। उनले स्कटल्यान्डको राष्ट्रिय टोलीबाट ८२ एकदिवसीय खेल र ७७ टी-२० खेल खेलेका छन्।
त्यसअघि कर्णालीका ओपनर प्रियांक पाञ्चल १२ रनमा आउट भएका थिए।
शनिबार कीर्तिपुरस्थित त्रिवि मैदानमा टस जितेको कर्णालीले फिल्डिङ रोजेपछि पहिले ब्याटिङ गरेको लुम्बिनीले २० ओभरमा ८ विकेटको क्षतिमा १५६ रन बनायो।
लुम्बिनीका कप्तान रोहितकुमार पौडेल एक रनले अर्धशतक बनाउन चुके। उनी १७औं ओभरको चौथो बलमा सोपालको बलमा नाजिबुल्लाह जाद्रानबाट ४९ रनमा क्याच भए। रोहितले ४३ बलमा ४ चौका र २ छक्का प्रहार गरे।
खराब सुरूवात गरेको लुम्बिनीका ओपनर सन्दीप जोरा दोस्रो ओभरमा नन्दन यादवको बलमा विल बोसिस्टोबाट एक रनमै क्याच भए।
डार्शी सर्टले १९ रन बनाए। उनले १४ बलमा ४ चौका प्रहार गरे। डार्शी र रोहितबीच दोस्रो विकेटको लागि ३६ रनको साझेदारी भयो।
सुस्त ब्याटिङ गरेको लुम्बिनीले पावरप्लेमा एक विकेटको क्षतिमा ३६ रन र १० ओभरमा ३ विकेटको क्षतिमा ५९ रन मात्र जोड्न सकेको थियो। यद्यपी लुम्बिनीले पछिल्लो पाँच ओभरमै ६८ रन जोडेको थियो।
दिलीप नाथ ६ रन, गुल्बादिन नइब ७ रन र सुमित महर्जनले ४ रन मात्र जोड्न सके। जेजी स्मितले १४ बलमा दुई चौका र १ छक्काको मद्दतमा २३ रन जोडे। अन्त्यमा रुबेल ट्रम्पलम्यानले १४ बलमा १ चौका र ३ छक्काको मद्दतमा नटआउट २९ रन जोडेपछि लुम्बिनीले १५० रन कटाएको थियो।
बलिङमा कर्णालीका नन्दन यादवले २ विकेट लिए भने सोमपाल कामी, गुल्सन झा, मार्क वाट, विपिन शर्मा र युवराज खत्रीले १-१ विकेट लिए।
यसअघि पहिलो खेलमा लुम्बिनी विजयी हुँदा कर्णालीले भने हार ब्यहोरेको थियो। एनपिएलमा आज दोस्रो खेलमा विराटनगर किंग्स र काठमान्डु गोर्खाजबीच खेल हुँदैछ।
-1746009348.jpg)
