नेपाल सरकार र नेपाल ओलम्पिक कमिटी (एनओसी) बीचको विवादले अर्को वर्ष जापानमा हुने २० औं एसियाली खेलकुदमा नेपाली खेलाडीको सहभागिता हुनेमा शंका बढेको भन्दै नेपाल राष्ट्रिय तथा अन्तर्राष्ट्रिय खेलाडी संघले चिन्ता व्यक्त गरेको छ।
खेलकुद ऐन विपरित साधारण सभा गराएको र अदातलको आदेश अवहेलना गरेको भन्दै सरकारले जीवनराम श्रेष्ठ नेतृत्वको नेपाल ओलम्पिक कमिटीलाई अवैध बताउँदै आएको छ।
तर एनओसीले भने विधानअनुसार निर्वाचन गराएको र आफूहरुलाई अन्तर्राष्ट्रिय मान्यता भएकाले सरकारले हस्तक्षेप गरेको भन्दै विरोध गर्दै आएको छ।
विवादले मिसन २०२६ को विशेष प्रशिक्षण तथा अन्य नियमित प्रशिक्षणमा रहेका खेलाडीमा अन्यौलता बढाएको भन्दै संघका अध्यक्ष दीपक श्रेष्ठ सम्बन्धित पक्षको ध्यानाकर्षण गराएको छन्।
‘खेलकुदमा देखिने पटक पटकको विवादले सबैभन्दा बढी मार खेलाडीलाई पर्ने गरेको छ। सरकार र एनओसीको अहिलेको विवाद यथास्थितिमा रहने हो भने एसियाली खेलकुदमा नेपालको सहभागितामा प्रश्न उठ्छ नै। अहिलेको यो अन्यौलतालाई चिर्न जरुरी छ। यसले तयारीमा रहेका खेलाडीको मानसिकता असर पर्न सक्छ,’ संघको भनाइ छ।
‘वर्षदिखि तयारी गर्दै आएका खेलाडीले एसियाली खेलकुदमा भाग लिन नपाउने अवस्था सृजना भएको अवस्थामा त्यसको जिम्मेवारी कसले लिने?’ संघको प्रश्न छ।
एक अर्कालाई दोषारोपण गरेर उम्कने प्रवृत्ति नेपाली खेलकुदमा नौलो नभएको बताउँदै संघले यसतर्फ सम्बन्धित सबैको ध्यानाकर्षण गराएको छ।
संघको भनाइ छ, ‘विवादमा को सहि को गलत भन्दा पनि एसियाली खेलकुदमा नेपाली खेलाडीको सहभागिता निश्चित गराउन सबै पक्षको पहलका लागि नेपाल राष्ट्रिय तथा अन्तर्राष्ट्रिय खेलाडी संघ आग्रह गर्दछ।’
-1746009348.jpg)
