नेपाली राष्ट्रिय महिला फुटबल टोलीका प्रशिक्षक प्याट्रिक डे वाइल्डले पदबाट राजीनामा दिएका छन्।
एएफसी एसियन कप छनोटका दौरान कप्तानको विषयमा विवाद भएका कारण वाइल्ड राजनीमा दिने स्थितिमा पुगेका हुन्। गत जेठ २२ मा नियुक्त भएका वाइल्ड दुई महिना पनि पूरा नहुन नपाउँदै राजीनामा दिने स्थितिमा पुगेका हुन्।
यसअघि अखिल नेपाल फुटबल संघ (एन्फा) ले वाइल्डलाई पत्राचार गर्दै एएफसी एसियन कप छनोटका दौरान भएको विवादको विषयमा ‘घटना विवरण’ दिन पत्राचार गरेको थियो।
उक्त पत्रको जवाफमा वाइल्डले राजीनामा दिएको एन्फा प्रवक्ता सुरेश शाहले बताए। पत्रमा उनले उल्लेख गरेका अन्य विषयमा भने खुलाइएको छैन।
उनको राजीनामाको विषयमा निर्णय भने भएको छैन। एन्फा अध्यक्ष पंकजविक्रम नेम्बाङ क्लब विश्वकपका लागि अमेरिका गएका कारण उनी फर्केपछि मात्र राजीनामाको विषयमा निर्णय हुने प्रवक्ता शाहले बताए।
उज्वेकिस्तानमा भएको एसियन कप छनोटका दौरान कप्तान छनोटको विषयमा प्रशिक्षक र एन्फा अफिसियलबीच विवाद भएको थियो।
विवादको क्रममा भएको ‘वास्तविकता’ बारे जानकरी दिन भन्दै एन्फाले पत्राचार गरेको थियो। त्यसको जवाफमा वाइल्डले राजीनामा पत्र पठाएका हुन्। वाइल्डले यसअघि छनोटकै दौरान एन्फा अफिसियलको विषयमा असन्तुष्टि जनाउँदै एन्फालाई इमेल गरेका थिए।
छनोटको महत्वपूर्ण तथा निर्णायक खेलमा उज्वेकिस्तानसँग पेनाल्टी सुटआउटमा पराजित भएपछि नेपाल एसियन कपमा छनोट हुन असफल भएको थियो। पेनाल्टी सुटआउटमा नेपाल ४-२ ले पराजित भएको थियो।
पेनाल्टी सुटआउटमा कप्तानको जिम्मेवारीमा रहेकी सावित्रा भण्डारी साम्बाको प्रहार पोलमा लागेको थियो भने गोलकिपर अन्जना रानामगरको प्रहारलाई उज्वेकिस्तानकी गोलकिपरले विफल पारेकी थिइन्। यससँगै एसियन कपमा पहिलो पटक पुग्ने अवसर गुमाएको नेपाली टिमभित्रको विवाद छताछुल्ल भएको थियो।
त्यसपछि वाइल्डले द काठमाडौं पोस्टलाई अन्तर्वार्ता दिँदै एन्फा व्यवस्थापनको आलोचना गरेका थिए भने उतैबाट बेल्जियम गएका थिए।
नेपाल फर्किएपछि टिम व्यवस्थापनले प्रशिक्षकका कारण कप्तानको विषयमा विवाद भएको दाबी गरेको थियो। एन्फाका पदाधिकारीले वाइल्डले अन्तिम समयमा मात्र कप्तानको नाम सार्वजनिक गर्दा विवाद भएको उनीहरुको दाबी थियो।
तर कप्तानको विषयमा वाइल्डलाई नेपालमै दबाब दिइएको थियो। दबाब दिएपछि वाइल्डले त्यसलाई आफ्नो काममा हस्तक्षेप ठान्दै अन्तिम समयमा मात्र सावित्रा भण्डारी साम्बालाई कप्तान घोषणा गरेका थिए।
एन्फा अफिसियलले छनोटको पहिलो खेलमा रेनुका नगरकोटीको नाम कप्तानको रुपमा एएफसीलाई पठाएको थियो। त्यो विषयमा प्लेयर बक्समै अफिसियल र प्रशिक्षकबीच तिक्तता देखिएको थियो।
-1746009348.jpg)
