पोर्चुगिज सुपरस्टार क्रिस्टियानो रोनाल्डोले साउदी अरेबियाको फुटबल प्रो लिगको क्लब अल-नासरमा आफ्नो तीनवर्षे यात्रा समाप्त भएको संकेत गरेका छन्।
उनले सामाजिक सञ्जालमा लेखेका छन्, ‘यो अध्याय समाप्त भयो। कथा अझै लेखिँदैछ। सबैलाई धन्यवाद।’
यो पोस्टले क्लबसँग जुन २०२५ मा समाप्त हुने सम्झौता थप नहुने संकेत गरेको छ।
४० वर्षीय रोनाल्डोले अल-नासरका लागि १०५ खेलमा ९९ गोल गरेका थिए। सोमबार अल फतेहविरुद्ध ३-२ को हारमा उनले आफ्नो अन्तिम गोल गरे, तर टोली अर्को सिजनको एएफसी च्याम्पियन्स लिगका लागि छनोट हुन असफल रह्यो र लिगमा तेस्रो स्थानमा रह्यो।
रोनाल्डोको अर्को गन्तव्यबारे विभिन्न चर्चा चलिहरेको छ। उनी अमेरिकामा अर्को महिना आयोजना हुने फिफा क्लब विश्वकपमा सहभागी ३२ क्लबमध्ये कुनै एकमा सामेल हुन सक्ने सम्भावना छ।
फिफा अध्यक्ष जियानी इन्फान्टिनोले रोनाल्डोको क्लब विश्वकपमा सहभागिताको आशा व्यक्त गरेका छन्।
साथै लिओनल मेसी आबद्ध अमेरिकाको इन्टर मियामीमा जोडिने चर्चा पनि छ। यद्यपी रोनाल्डोले अमेरिकन लिग मेजर लिग सकरप्रति खासै रुचि नदेखाएको बताइएको छ।
यस्तै उनी करिअर सुर गरेको क्लब स्पोर्टिङ सीपी (पोर्चुगल) मा जाने पनि चर्चा छ।
मोरक्कोको क्लब विडाडले रोनाल्डोलाई २०२५ को फिफा क्लब विश्वकपका लागि अनुबन्ध गर्न इच्छुक रहेको बताइएको थियो।
साउदी अरबमै रहँदा रोनाल्डोले अल-हिलालमा जाने सम्भावना पनि उल्लेख गरिएको छ। यो क्लबले २०२५ को क्लब विश्वकपमा छनोट भएको छ। क्लब साउदी लिगमा सबैभन्दा सफल टोलीमध्ये एक हो।
ब्राजिलका क्लबहरू (पाल्मेरास, फ्लामेन्गो, फ्लुमिनेनसे, बोटाफोगो) २०२५ को क्लब विश्वकपमा सहभागी छन्। यी क्लबहरूले रोनाल्डोलाई ठूलो प्रस्ताव दिन सक्ने बताइएको छ, यद्यपि कुन क्लब हो भन्ने स्पष्ट छैन।
तर रोनाल्डोले आफ्नो भविष्यबारे कुनै निर्णय सार्वजनिक गरेका छैनन्। उनको मुख्य लक्ष्य २०२६ को विश्वकप र एक हजार व्यवसायिक गोल गर्नमा केन्द्रित छ।
