साविक विजेता एट्लेटिको म्याड्रिडले स्पेनिस ला लिगामा लगातार दोस्रो जित निकालेको छ। घरेलु मैदानमा आइतबार रातिभएको खेलमा एट्लेटिकोले इल्चेलाई १–० गोलले हरायो। एट्लेटिकोको जितमा अर्जेन्टिीनी स्ट्राइकर एन्जल कोर्रिया नायक बने।
एन्जलले ३९औं मिनेटमा रोड्रिगो डे पउलको पासमा गोल गरेका थिए। २६ बर्षीय एन्जलले एट्लेटिकोमा सानदार प्रदर्शन गरिरहेका छन्। उनले यस अघिल्लो खेलमा पनि दुई गोल गरेका थिए। लिगको पहिलो खेलका एन्जलकै दुई गोल सहयोगमा एट्लेटिकोले सेल्टाभिगोलाई २–१ गोलले स्तब्ध बनाएको थियो।
जितसँगै ६ अंक बनाएको एट्लेटिको शीर्षस्थानमा छ। इल्चे एक अंक सहित १६औं स्थानमा छ।
अर्को खेलमा ब्राजिलका स्ट्राइकर भिनिसियस जुनियरले दुई गोल गरेपछि रियल म्याड्रिड हारबाट जोगिएको छ।
रियलले १० खेलाडीमा सीमित लिभान्तेसँग ३–३ गोलको बराबरी खेल्दै अंक बाँडेको हो। लिभान्तेको घरेलु मैदानमा खेलिएको प्रतिस्पर्धात्मक खेलमा सुरुवाती अग्रता रियलले लिएको थियो। पाँचौ मिनेटमा ग्यारेथ बेलले गोल गरे।
बेलले करिम बेन्जेमाको पासमा गोल गरेका थिए। पहिलो हाफमा १–० गोलको अग्रता लिएको रियलले दोस्रो हाफको शुरुमै दुई गोल खायो।
४६औं मिनेटमा रोजरले गोन्जालो मेरेलोको पासमा गोल गर्दै खेललाई बराबरीमा ल्याए। ५७औं मिनेटमा जोसे क्याम्पानाले जर्ग डे फ्रुटोसको पासमा गोल गर्दै लिभान्तेलाई अगाडी बढाए।
७३औं मिनेटमा भिनिसियस जुनियरले गोल गर्दै खेललाई पुनः बराबरीमा ल्याए। उनले कासेमिरोको पासमा गोल गरेका थिए। ७९औं मिनेटमा रोवेरले गोल गर्दै लिभान्टेलाई फेरि अग्रता दिलाए ।
त्यसपछि भिनिसियसले ८५औं मिनेटमा ब्यक्तिगत दोस्रो गोल गर्दै खेललाइ ३–३ गोलको बराबरीमा ल्याए। भिनिसियसले करिम बेन्जेमाको पासमा गोल गर्दै टोलीलाई हारबाट जोगाएका थिए।
८७औं मिनेटमा अइटोर रातो कार्ड पाउँदै बाहिरिएपछि लिभान्ते १० खेलाडीमा समेटिएको थियो। तर रियलले त्यसको फाइदा उठाउन सकेन।
बराबरीसँगै चार अंक बनाएको रियल दोस्रो स्थानमा छ। लिगमा दोस्रो बराबरी खेलेको लिभान्ते दुई अंक सहित आठौं स्थानमा छ।
आइतबार रातिनै भएको अर्को खेलमा रियल सोसिडाडले रायो भालेकानोलाई १–० गोलले हरायो।
ला लिगा अन्तर्गत सोमबार राति सेभिया र गेटाफे तथा ओसासुना र सेल्टाभिगोबीच प्रतिस्पर्धा हुनेछ।
-1746009348.jpg)
