नेपाली राष्ट्रिय फुटबल टिमका प्रशिक्षक अब्दुल्लाह अलमुताइरी प्रशिक्षणमा फर्किएका छन्। उनले पोखरामा आइतबार नेपाली राष्ट्रिय टिमलाई प्रशिक्षण गराएका हुन्।
यसअघि वरिष्ठ उपाध्यक्ष पंकजविक्रम नेम्बाङ तथा दुई पत्रकारसँगको विवादका कारण उनलाई प्रशिक्षण गराउनबाट रोक लगाइएको थियो।
गत साउन तेस्रो साता अखिल नेपाल फुटबल संघ (एन्फा) ले राष्ट्रिय टिमका व्यवस्थापक मधुसुदन उपाध्यायलाई पत्र लेख्दै अर्को निर्णय नभएसम्मका लागि प्रशिक्षण नगराउन भनिएको थियो।
साथै एन्फाले विवाद समाधान भएपछि मात्र अर्को निर्णय लिने बताएको थियो।
त्यसपछि नेपाली टिमको प्रशिक्षण रोकिएको थियो। अहिले पोखरामा जारी अभ्यासमा दौरान अलमुताइरी पोखरामै रहेका थिए। यसअघि उनी अभ्यासमा देखिएका थिएनन्।
यसअघि असार दोस्रो साता अलमुताइरी र दुई पत्रकारबीच विवाद भएको थियो। त्यसको तीन दिनमा अलमुताइरीले वरिष्ठ उपाध्यक्षका कारण राजीनामा दिन एन्फा जान लागेको भन्दै फेसबुकमा लेखेका थिए। लगत्तै वरिष्ठ उपाध्यक्ष नेम्बाङले खण्डन गर्दै छानविनको माग गरेका थिए।
जसको छानविन अहिले राष्ट्रिय खेलकुद परिषद्ले गरिरहेको छ। गत साता परिषद्ले गठन गरेको छानविन समितिले एन्फाका अध्यक्षदेखि वरिष्ठ उपाध्यक्ष र प्रशिक्षकसहित दर्जन व्यक्तिसँग वयान लिएको थियो।
छानविन समितिका प्रवक्ता सुवर्ण श्रेष्ठका अनुसार अहिले कागजपत्र मगाएर अध्ययन गर्ने काम भइरहेको छ। उनले भोलिसम्ममा छानविन सक्ने जानकारी दिइन्।
साथै अलमुताइरी प्रशिक्षणमा फर्कने विषय एन्फाको आन्तरिक विषय भएको पनि उनको भनाइ छ।
-1746009348.jpg)
