साफ च्यापियनसिप र एसियन कपको तयारीका लागि बन्द प्रशिक्षण बोलाइएका राष्ट्रिय फुटबल टिमका खेलाडीहरूको हिजो (बुधबार) कोरोना परीक्षणका लागि स्वाब संकलन गरिएको थियो।
जसमा बेलुका रिपोर्ट आउँदा ११ जना खेलाडीसहित २० जनालाई पोजेटिभ देखिएको थियो।
जसका कारण आजदेखि सुरु हुने भनिएको बन्द प्रशिक्षण स्थगित गरियो।
तर आज परीक्षण गर्दा सबै खेलाडीको नतिजा नेगेटिभ आएको अखिल नेपाल फुटबल संघ (एन्फा) का प्रवक्ता किरण राईले सेतोपाटीलाई जानकारी दिए।
'हिजो विहान परीक्षण गरिएको रिपोर्ट बेलुका आउँदा २० जनालाई पोजेटिभ देखियो। जसमा ११ जना र ९ जना अफिसियल थिए,' उनले भने, 'हामीले फेरि पोजेटिभ आएका सबैको पुन: परीक्षण गरायौं। जसमा आज ११ खेलाडीसहित १३ जनाको रिपोर्ट नेगेटिभ आएको छ।'
कुवेत भएको विश्वकप छनोट खेलेर फर्किएको नेपाली टिमले यसअघि कोरोनाको खोप लगाएको थियो।
साफ च्याम्पियनसिप र एएफसी कपको छनोटको तयारी गर्न बन्द प्रशिक्षणका लागि ५० खेलाडी छनोट गरिएको थियो। राष्ट्रिय फुटबल टिमका प्रशिक्षक अब्दुल्लाह अलमुताइरीले प्रारम्भिक टिम घोषणा गरेका थिए।
प्रशिक्षण एन्फा कम्प्लेक्स सातदोबाटोमा हुने तय थियो। प्रशिक्षण दुई चरणमा हुनेछ। एउटा टोलीले बिहान तथा अर्को टोलीले अपराह्न अभ्यास गर्ने छ।
बन्द प्रशिक्षणका लागि अर्पण कार्की, विकेश कुथु, विशाल श्रेष्ठ, विशाल सुनार, दीप कार्की, किरणकुमार लिम्बू, आशिष लामा, अभिषेक रिजाल, अमित तामाङ र अनन्त तामाङ टिममा छन्।
यसैगरी अन्जन विष्ट, एरिक विष्ट, आयुष घलान, भरत खवास, विवेक बस्नेत, विशाल राई, दर्शन गुरुङ, दिनेश राजवंशी, दोना थापा, गौरव बुढाथोकी, गौतम श्रेष्ठ, जर्जप्रिन्स कार्की, कमल थापा, मनिष डाँगी, मिक्चेन तामाङ, नवयुग श्रेष्ठ, नीरज बस्नेत र निशान खड्का पनि बन्द प्रशिक्षणका लागि छनोटमा छन्।
यस्तै छनोट गरिएका अन्य खेलाडीमा नितिन थापा, प्रकाश बुढाथोकी, प्रिजन तामाङ, पुजन उपरकोटी, राजन गुरुङ, रजीन धिमाल, राजीव लोप्चन, रन्दीप पौडेल, रवि पासवान, रोहित चन्द, सन्जोक राई, सन्तोष तामाङ, सेसेहाङ आङ्देम्बे, शिशिर लेखी, सुदील राई, सुजल श्रेष्ठ, सुमन अर्याल, सुमन लामा, सुनील बल, सुरजज्यू ठकुरी, तेज तामाङ र त्रिदेव गुरुङ रहेको एन्फाले जनाएको छ।
साफ च्याम्पियनसिप आगामी सप्टेम्बर १४ देखि २५ तारिखसम्म बङ्गलादेशमा हुनेछ भने एशियन कपको अन्तिम छनोट सन् २०२२ को फेब्रुअरीमा हुनेछ।
-1746009348.jpg)
