तीन वर्षअघि फ्रान्स र केलियन एमबाप्पे विश्व फुटबलको उचाइमा थिए।
फ्रान्सले विश्वकपको उपाधि जितेको थियो। स्ट्राइकर एमबाप्पेले १९ वर्षको उमेरमा विश्वकपको ट्रफी उचाल्ने अवसर पाएका थिए। उनी विश्वकपको उत्कृष्ट युवा खेलाडी हुँदा महान् फुटबल खेलाडी पेलेका तीन कीर्तिमान बराबरी थिए।
तीन वर्षपछि एमबाप्पेका लागि फुटबल करिअरको बिर्सनलायक दिन आयो। उनले निर्णायक पेनाल्टीमा गोल गर्न सकेनन्।
जसका कारण फ्रान्स युरो २०२० को अन्तिम १६ बाटै बाहिरियो। एमबाप्पेले स्विट्जरल्यान्ड्सविरुद्ध पेनाल्टी सुटआउटमा गोल गर्न चुक्दा फ्रान्स ५-४ गोलले पराजित भयो।
लामो करिअरको दौरान एमबाप्पेका लागि यो घटना सिक्ने अवसर हुन सक्छ। किनभने उनले करिअरमा अझै धेरै खेल्न बाँकी छ।
युरो २०२० मा एमबाप्पे किन चल्न सकेनन् भन्ने प्रश्न उठ्न थालेका छन्।
गत सिजन उनले क्लब र देशका लागि गरी कुल ४१ गोल गरेका थिए। पिएसजीले सिजनको फ्रेन्च कपको उपाधि जित्दा एमबाप्पेको भूमीका प्रभावशाली देखिएको थियो।
तर युरो २०२० मा उनले चार खेलमा एक गोल पनि गर्न सकेनन्। उनको उपलब्धि भनेको चार खेलमा एक एसिस्ट गर्नु हो। उनले प्रतियोगिताभर १४ प्रहार गरे पनि गोल हुन सकेन।
२२ वर्षीय एमबाप्पेलाई स्विट्जरल्यान्डविरुद्धको पेनाल्टी सुटआउटमा पाँचौ नम्बरमा पेनाल्टी हान्ने गहन जिम्मेवारी थियो।
तर उनको प्रहारलाई स्विट्जरल्यान्ड्सका गोलकिपर यान सोमरले उत्कृष्ट बचाउ गरे।
उनले स्विट्जरल्यान्डविरुद्धको खेलमा ६ प्रहार गरेका थिए। तर ती सबै प्रहार अनटार्गेट थिएनन्।
उनले युरो २०२० मा चार खेलमा ३९० मिनेट खेल्दा तीन सर्टमात्र अनटार्गेट थिए। उनले युरो २०२० मा दिएका ९८ मध्ये ८४ पास दिए सफल भए।
युरो २०२० मा असफल सिद्ध भएका एमबाप्पेले स्विट्जरल्यान्ड्सविरुद्धको खेलमा पेनाल्टी मिस गरेकोमा माफी मागेका छन्।
उनले सोचेजस्तो प्रदर्शन गर्न नसकेपछि खेलाडीहरूले उनलाई सान्त्वना दिइरहेका छन्। जसमा महान् फुटबल खेलाडी पेले समेत छन्।
यसअघि पेलेले विश्वकप २०१८ मा एमबाप्पेले आफ्नो रेकर्ड बराबरी गरेपछि प्रशंसा गरेका थिए।
उनले विश्वकपको फाइनलमा एक गोल गरेका थिए। विश्वकपमा ४ गोल गरेका एमबाप्पे २१ औं संस्करणको विश्वकपमा उत्कृष्ट युवा खेलाडी बनेका थिए।
पहिलो पटक विश्वकप खेल्दा एम्बाप्पेले ब्राजिलका महान फुटबलर पेलेका तीन रेकर्ड बराबर गरेका थिए।
अर्जेन्टिनाविरूद्धको खेलमा २ गोल गरेपछि विश्वकपको एउटै खेलमा २ गोल गर्ने एम्बाप्पेले दोस्रो टिनएजर खेलाडी बनेका थिए। यसअघि पेलेले सन् १९५८ मा विश्वकपको एकै खेलमा २ गोल गरेका थिए।
विश्वकपको फाइनलमा गोल गर्ने टिनएजरको रेकर्ड पनि पेलेका नाममा थियो। क्रोएशियाविरूद्धको खेलमा गोल गरेर एमबाप्पेले त्यो रेकर्ड पनि बराबर गरेका थिए। स्विडेनविरूद्धको फाइनल खेलमा गोल गर्दा पेले १७ वर्षका थिए।
पेलेले पहिलो विश्वकप खेल्दा ब्राजिलले उपाधि चुमेको थियो र उनी उत्कृष्ट युवा खेलाडी बनेका थिए। एमबाप्पेले पहिलो विश्वकप खेल्दा फ्रान्सले उपाधि जित्यो र उनी उत्कृष्ट युवा खेलाडी बने।
एमबाप्पेको गति र खेल शैलीको तारिफ गर्दै धेरैले उनलाई नयाँ पुस्ताका नयाँ स्टारका रूपमा अर्थ्याउने गरेका छन्।
एमबाप्पे कति प्रतिभाशाली खेलाडी हुन् भन्ने बुझ्न उनको खेल कौशलसँगै उनले जुन गतिमा खेल्छन् त्यो पनि बुझ्न आवश्यक छ।
धेरै व्यावसायिक फुटबल खेलाडी छरिता हुन्छन् किनकी उनीहरू सामान्य मान्छेभन्दा छिटो दौडिन्छन्। कोही भने प्रभाव पार्ने अर्थमा छरिता हुन्छन्। यसको मतलब उनीहरू व्यावसायिक फुटबल खेलाडीभन्दा पनि छिटो हुन्छन्। विश्वकपमा धेरै खेलाडी छिटो दौडिन्छन्। तर केही यस्ता खेलाडी छन् तिनको गति खेलाडीको मानवीय क्षमताभन्दा बढी देखिन्छ।
एमबाप्पे त्यस्तै क्षमता भएका खेलाडी हुन्। उनी अरूले खेल्नेभन्दा छिटो फुटबल खेल्दैनन्। उनी त अरूले हेर्न सक्नेभन्दा छिटो फुटबल खेल्छन्। तपाईंले सोच्न सक्नेभन्दा अगाडि उनी दौडिसकेका हुन्छन्।
एम्बाप्पे खेलमात्र होइन सामाजिक कामले पनि चर्चामा आएका छन्।
विश्वकप खेल्दा पाइएको तलब र भत्ता साढे ५ करोड रूपैयाँ उनले शारीरिक अपांगता भएका बालबालिकालाई खेलकुद गतिविधिमा सहभागी गराउने संस्था प्रियर्स डि कोर्डिस एसोसियसनलाई दिएका थिए।
एम्बाप्पे आप्रवासी आमाबुवाका सन्तान हुन्। उनका बाबु पश्चिमी अफ्रिकी मुलुक क्यामरूनबाट आएर फ्रान्समा बसोबास गरेका हुन् भने आमा अल्जेरियाबाट आएकी हुन्। उनका बाबु पनि फुटबल खेलाडी र प्रशिक्षक हुन् भने आमा धाविका हुन्।
-1746009348.jpg)
