इंग्लिस प्रिमियर लिगमा म्यानचेस्टर युनाइटेडले कीर्तिमानी जित हात पारेको छ।
मंगलबार राति भएको खेलमा युनाइटेडले ९ खेलाडीमा सीमित साउथह्याम्टनविरुद्ध ९-० गोलको जित हात पारेको हो।
प्रिमियर लिगमा ९-० को अन्तरको नतिजा आएको यो तेस्रो पटक हो। सन् १९९५ मा युनाइटेडले ९-० को जित हात पार्ने क्रममा इप्स्विच टाउनलाई पराजित गरेको थियो।
खेलको दोस्रो मिनेटमा साउथह्याम्टन १० खेलाडीमा सीमित बनेपछि युनाइटेड खेलमा हाबी देखियो।
१८ मिनेटमा युनाइटेडका लागि वान विसाकाले पहिलो गोल गरे। २५ मिनेटमा रास्फोडले अग्रता दोब्बर पारे।
३४ मिनेटमा साउथह्याम्टनका बेडनारेकले आत्मघाती गोल गरेका थिए। ३९ मिनेटमा काभानीले युनाइटेडका लागि चौथो गोल गरे।
पहिलो हाफमा ४-० ले अघि रहेको युनाइटेडले दोस्रो हाफमा थप पाँच गोल गर्यो।
जसमा मार्सियलले ६९ र ९० मिनेटमा गरी दुई गोल गरे। म्याकटोमिनीले ७१ मिनेटमा अर्को गोल गर्दा ब्रुनो फर्नान्डेजले ८७ मिनेटमा पेनाल्टीमार्फत आठौं गोल गरे। साउथह्याम्टनका बेडनारेकले फल गरेका कारण रातो कार्ड पाए भने युनाइटेडले पेनाल्टी पायो।
दोस्रो हाफको इन्जुरी टाइमको तेस्रो मिनेटमा युनाइटेडका जेम्सले नवौं गोल गरेका थिए।
जितपछि अंक तालिकाको दोस्रो स्थानमा रहेको म्यानचेस्टर युनाइटेडले २२ खेलबाट ४४ अंक जोडेको छ। शीर्ष स्थानको म्यानचेस्टर सिटीको २० खेलबाट ४४ अंक नै छ।
-1746009348.jpg)
