कोपा इटालिया फुटबल प्रतियोगिताअन्तर्गत तनावपूर्ण खेलमा झगडामा उत्रिएका एसी मिलानका स्ट्राइकर ज्लाटन इब्राहिमोभिच र इन्टर मिलानका फरवार्ड रोमेलु लुकाकुलाई प्रतिबन्ध लगाइएको छ।
गत मंगलबार भएको मिलान डर्बीका दौरान झगडामा उत्रिएका दुवै खेलाडीलाई एक–एक खेलको प्रतिबन्ध लगाइएको हो।
एसी मिलानका डिफेन्डर एलेसियोले फल गरेको भन्दै लुकाकुले अपील गरेका थिए। तर इब्राहिमोभिचले कुनै फल नभएको संकेत गर्दै बल अघि बढाएका थिए। त्यसपछि लुकाकु निकै रिसाएका थिए।
सुरुमा भनाभन गरेका उनीहरूले त्यसपछि मुखामुख गर्दै टाउको ठोक्काएका थिए।
आक्रामक देखिएका लुकाकु इब्राहिमोभिचतर्फ गएका थिए। लुकाकुले केही शब्द बोल्दै टाउकोले हान्न खोजेको भिडिओमा देखिएको थियो।
त्यसपछि रेफ्रीले दुवै खेलाडीलाई पहेँलो कार्ड देखाएका थिए।
५८ मिनेटमा इब्राहिमोभिचले रातो कार्ड पाउँदै मैदान छाड्न बाध्य भए।
खेलपछि बेल्जियम फरवार्ड लुकाकुमाथि जातीय दुर्व्यवहार गरेको भन्ने आरोप इब्राहिमोभिचले अस्वीकार गरेका थिए।
लुकाकु र इब्राहिमोभिच कुनै समय एकै टिमका सहकर्मी थिए। सन् २०१७-१८ को सिजनमा दुवैले इंग्लिस क्लब म्यानचेस्टर युनाइटेडबाट खेलेका थिए।
गत वर्ष लुकाकुले स्विडिस स्ट्राइकर इब्राहिमोभिचको प्रशंसा गर्दै अन्तर्वार्ता दिएका थिए।
-1746009348.jpg)
