आयोजक सताक्षीधाम स्पोर्टिङ क्लब चर्च व्वाइज काठमाडौंलाई ३-० ले हराउँदै सेमिफाइनलमा प्रवेश गरेको छ।
सताक्षी स्पोर्टिङ क्लबद्धारा आयोजित दोस्रो सताक्षी गोल्डकपको तेस्रो दिन बिहिबार राष्ट्रिय खेलाडीले भरिएको आयोजकले काठमाडौंको चर्च ब्वाइजमाथि एक पक्षीय खेल खेल्दै ३-०ले विजयी भएको हो।
पहिलो हाफ गोल रहित बराबरी खेलेको सताक्षीले दोस्रो हाफमा आक्रमक खेल खेल्दै ३ गोल गर्यो। दोस्रो हाफको ८ औं मिनेटमा बिमल घर्तिमगरले गोल गर्दै खेलमा घरेलु टोलीलाई अग्रता दिलाए। यस्तै खेलको १७औं मिनेटमा सुनिल बलले गोल गर्दै घरेलु टोलीलाई २-०को अग्रता दिलाए।
पर्याप्त दर्शकको समर्थक पाएको घरेलु टोलीका लागि बिमल घर्तिमगरले ३१औं मिनेटमा व्यक्तिगत दोस्रो तथा टिमका लागि तेस्रो गोल गरे। त्यस पछि खेलमा गोल भएन र आयोजक ३-० को फराकिलो जित हात पार्दै अन्तिम चारमा प्रवेश गर्यो।
झापाली टिमका लागि २ गोल गरेका घर्ति म्यान अफ द म्याचसमेत भए। उनले १० हजार रूपैयाँ पुरस्कार पाए।
खेलमा काठमाडौंले केही राम्रा गोल गर्ने अवसरहरू पहिलो हाफमा गुमाउँदा खेलमा फर्कन सकेन। यता आयोजकले पनि केही राम्रा गोल गर्ने अवसर गुमाउँदा थप गोल गर्न बञ्चित भएको थियो।
भोलि रूपन्देही ११ र मोरङ ११ बीच खेल हुने आयोजकले जनाएको छ।
