अन्तर्राष्ट्रिय क्रिकेट काउन्सिल (आइसिसी) ले सन् २०२६ मा भारत र श्रीलंकामा हुने आइसिसी पुरुष टी-२० विश्वकपका लागि आयोजक शहर तोकेको छ।
जसमा भारतका अहमदाबाद, दिल्ली, कोलकाता, चेन्नई र मुम्बईमा खेल हुनेछन्। यस्तै श्रीलंकाको कोलम्बो र क्यान्डीमा दुई वटा रंगशाला विश्वकपका खेल हुनेछन्।
टी-२० विश्वकप फेब्रुअरी ७ मा सुरु भई मार्च ८ मा (माघ २४ देखि फागुन २४ सम्म) अहमदाबादमा हुने फाइनल खेलसँगै समाप्त हुनेछ। पाकिस्तान फाइनलमा पुगे श्रीलंकामा फाइनल हुनेछ।
यहि समयमा नेपालको बृहद राष्ट्रिय खेलकुद पनि आयोजना हुँदैछ। राष्ट्रिय खेलकुद परिषदको बोर्ड बैठकले फागुन १ देखि ७ गतेसम्मका लागि राष्ट्रिय खेलकुदको नयाँ मिति तोकेको थियो।
नेपालले यसपटक तेस्रो पटक टी-२० विश्वकप खेल्दैछ। नेपालले पनि विश्वकप खेल्ने भएपछि खेलप्रेमीको ध्यान विश्वकपले तान्नेछ। जसले नेपालकै सबैभन्दा ठूलो खेलकुदको प्रतिस्पर्धा दशौं राष्ट्रिय खेलकुदलाई छायाँमा पर्न सक्छ। यस्तै क्रिकेटको पनि राष्ट्रिय खेलकुदमा प्रतिस्पर्धा हुने भएकाले राष्ट्रिय टोलीका खेलाडीले तोकिएको समयमा राष्ट्रिय खेलकुद खेल्ने सम्भावना छैन।
कर्णाली प्रदेशमा हुने दशौं राष्ट्रिय खेलकुद प्रतियोगिता गत वर्ष हुने तय भए पनि पटक-पटक स्थगित हुँदै आएको छ।
विश्वकपका लागि आइसिसीले अर्को हप्ता खेल तालिका सार्वजनिक गर्ने सम्भावना छ। प्रतियोगिता सुरु हुन करिब तीन महिना मात्र बाँकी छ। अधिकांश सहभागी राष्ट्रहरूले टोलीको समूह विभाजन र तालिकाको बारेमा आइसिसीको जानकारी कुरिरहेका छन्। आइसिसीले अहिलेसम्म प्रतियोगिताको टिकटबारे पनि जानकारी सार्वजनिक गरेको छैन।
भारत र पाकिस्तानबीच भएको सम्झौता अनुसार पाकिस्तानले आफ्ना सबै खेल श्रीलंकामा खेल्नेछ, जसमा एकअर्काको देशमा हुने बहु-राष्ट्रिय प्रतियोगिताहरूमा तटस्थ स्थानमा खेल्ने सहमति भएको छ। यदि पाकिस्तान फाइनलमा पुग्यो भने, त्यो खेल श्रीलंकामै हुनेछ।
२०२६ को टी-२० विश्वकपको ढाँचा अघिल्लो संस्करण जस्तै हुनेछ। २० टोलीलाई पाँच-पाँच वटाको कुल चार समूहमा विभाजन गरिनेछ। जसमा प्रत्येक टोलीले अरूसँग एक पटक खेल्नेछ।
प्रत्येक समूहका शीर्ष दुई टोली सुपर-एट चरणमा प्रवेश गर्नेछन्, जहाँ उनीहरूलाई चार-चार वटाको दुई समूहमा राखिनेछ। प्रत्येक सुपर-एट समूहका शीर्ष दुई टोलीले त्यसपछि सेमिफाइनल पुग्नेछन्। सेमिफाइनलका विजेताहरू फाइनलमा भेट्नेछन्।
आयोजक भारत र श्रीलंका बाहेक २०२४ को टी-२० विश्वकपका शीर्ष सात टोलीहरू – अफगानिस्तान, अष्ट्रेलिया, बङ्गलादेश, इङ्गल्याण्ड, दक्षिण अफ्रिका, संयुक्त राज्य अमेरिका र वेस्ट इन्डिजले पनि स्वत: प्रतियोगिताका स्थान पक्का गरेका थिए। टी-२० वरीयताका आधारमा न्युजिल्याण्ड, पाकिस्तान र आयरल्याण्डले विश्वकपमा पक्का गरेका थिए।
क्यानाडाले अमेरिका क्वालिफायरबाट स्थान बनाउँदा पहिलो पटक टी-२० विश्वकपमा सहभागी हुने इटाली र नेदरल्याण्ड्सले युरोपमा भएको पाँच टोलीको प्रतियोगिताबाट विश्वकपको टिकट पक्क गरे। नामिबिया र जिम्बाब्वेले अफ्रिका क्वालिफायरका आठ टोलीबाट शीर्ष दुईमा परेका थिए। नेपाल, ओमान र युएईले एसिया-ईएपी राउन्डबाट विश्वकपमा स्थान पक्का गरे।
भारत टी-२० विश्वकपको डिफेन्डिङ च्याम्पियन हो। भारतले बार्बाडोसमा भएको २०२४ टी-२० विश्वकपको फाइनलमा दक्षिण अफ्रिकालाई हराएको थियो।
-1746009348.jpg)
