अस्ट्रेलियाको नर्दन टेरेटोरीमा जारी टप एन्ड टी-२० सिरिजमा नेपालले दोस्रो जित निकालेको छ। आफ्नो पाँचौं खेलमा नेपालले मेलवर्न रेनेगेड्स एकेडेमीलाई ३३ रनले पराजित गर्दै सिरिजमा दोस्रो जित दर्ता गराएको हो।
डार्बिनमा नेपालले दिएको १४० रनको लक्ष्य पछ्याएको मेलवर्न २० ओभरमा १०६ रनमा अलआउट भयो।
खेलको तेस्रो ओभरमा मेलवर्नका ड्यान ब्रासरलाई २ रनमा बोल्ड गरेका सोमपाल कामीले १६औं ओभरमा उत्कृष्ट बलिङ गर्दा खेल नेपालको पक्षमा आयो।
१६औं ओभरको पहिलो बलमा जय लेमिन १८ रनमा रनआउट भएका थिए। त्यसपछि सोमपालले यो ओभरको पाँचौ बलमा अर्जुन नयरलाई २६ रनमा बोल्ड गरे भने अन्तिम बलमा ओ'निललाई शून्यमा एलबिडब्लूको धराापमा पारे। यो ओभरमा ३ विकेट लिएको नेपालले ६ रन खर्चिएको थियो।
अन्तिम ओभरको अन्तिम दुई बलमा सोमपालले विकेट लिएपछि मेलवर्न अलआउट भएको थियो।
बलिङमा नेपालका लागि सोमपाल कामीले ५ विकेट लिए। उनले चार ओभरमा १७ रन मात्र दिए। यस्तै कुशल भुर्तेलले २ विकेट लिँदा २० रन खर्चिए।
मेलवर्नका लागि नयरले बनाएको २६ रन सर्वाधिक रह्यो।
त्यसअघि पहिले ब्याटिङ रोजेको नेपालले ९ विकेटको क्षतिमा १३९ रन मात्र बनाउन सक्यो।
खेलका लागि पाँच खेलाडी परिवर्तन गरेको नेपालका कुशल मल्लले सबैभन्दा बढी २९ रन बनाए। कप्तानको भूमिकामा रहेका दीपेन्द्रसिंह ऐरीले २७ रन र लोकेश बमले २४ रन जोड्न सके।
बलिङमा मेलवर्नका फर्ग्युस ओ'निल, कोलुम स्ट, लाच्लान बाङ र माइकल आर्चरले २-२ विकेट लिए।
होबार्ट हुरिकेन्सविरूद्ध खेलेका आसिफ शेखसहित कप्तान रोहितकुमार पौडेल, करण केसी, रिजन ढकाल र सन्दीप लामिछाने टोलीमा थिएनन्।
टोलीमा फर्किएका दीपेन्द्रसिंह ऐरीलाई कप्तानको जिम्मेवारी दिइएको थियो भने लोकेश बम विकेटकिपरको रुपमा थिए। यस्तै गुल्सन झासहित गतिका बलरद्वय रुपेश सिंह र सोमपाल कामी टोलीमा फर्किएका थिए। सन्दीपको स्थानमा शाहब आलामले बलिङ गरे।
हिजो खेलेका कुशल भुर्तेल, लोकेश बम, भीम सार्की, आरिफ शेख, कुशल मल्ल र नन्दन यावद गरी ६ खेलाडी भने निरन्तर टोलीमा समावेश थिए।
यससँगै नेपालले सिरिजका पाँच खेल खेल्दा तीन खेलमा पराजय र दुई खेलमा जित निकालेको छ।
नेपालले मंगलबार होबार्ट हुरिकेन्सलाई ६६ रनले हराएको थियो। सुरुवाती तीन खेलमा भने नेपाल पराजित भएको थियो। नेपाल घरेलु टोली नर्दन टेरेटोरी, बंगलादेश ए र मेलवर्न स्टार्स एकेडेमीसँग पराजित भएको थियो।
सिरिजमा अस्ट्रेलियाको बिग ब्यास टोलीका एकेडेमी टोलीसहित पाकिस्तान र बंगलादेशको ए टोलीसँग सहभागी छन्।
अब नेपालले अन्तिम खेलमा शुक्रबार पाकिस्तान शाहिन्सासँग खेल्नेछ।
यही वर्षको अक्टोबरमा ओमानमा हुने आइसिसी पुरूष टी-२० विश्वकपको एसिया तथा पूर्वी एसिया-प्रशान्त क्षेत्रको संयुक्त छनोट प्रतियोगिताको तयारीका लागि नेपाल अस्ट्रेलियामा गएको हो।
यो सिरिजपछि नेपालले एक साता अस्ट्रेलियामा थप अभ्यास गर्नेछ।
नेपालले क्रिकेट एसिटीसँग २६ अगस्टमा दुई वटा र साउथ अस्ट्रेलियासँग २८ अगस्टमा दुई वटा गरी कुल चार वटा टी-२० खेल खेल्नेछ। यस्तै ३० अगस्टमा साउथ अस्ट्रेलियासँग नै एकदिवसीय खेल खेल्नेछ।
नेपालले अस्ट्रेलियामा सिरिज खेलेपछि सेप्टेम्बरमा युएईमा वेस्ट इन्डिजसँग तीन खेलको टी-२० सिरिज खेल्दैछ।
एसिया एन्ड इस्ट एसिया प्यासेफिक छनोटमा नेपालसहित नौ टोलीले भाग लिँदैछन्। शीर्ष तीन टोली अर्को वर्ष भारतमा हुने विश्वकपमा पुग्नेछन्।
नेपाली टोलीः रोहित पौडेल (कप्तान), दीपेन्द्रसिंह ऐरि (उप-कप्तान), सन्दीप लामिछाने, कुशल भुर्तेल, आसिफ सेख, कुशल मल्ल, गुलशन झा, आरिफ सेख, भीम सार्की, रुपेस कुमार सिंह, सोमपाल कामी, नन्दन कुमार यादव, करण के सी, रिजन ढकाल, लोकेस बम, साहब आलम
-1742801159.jpg)
-1746009348.jpg)
