नेपाल क्रिकेट क्यान (क्यान) ले लुम्बिनी प्रदेश क्रिकेट संघका पूर्वअध्यक्ष तथा अन्तर्राष्ट्रिय अम्पायर संजय गुरूङलाई प्रतिबन्ध लगाएको छ।
क्यानका महाप्रवन्धक उत्सव ढुंगानाले गुरूङलाई अम्पायरिङसहित कुनै पनि क्रिकेट गतिविधिमा संलग्न नगराउने प्रतिबन्ध लगाइएको भन्दै लुम्बिनी प्रदेश संघलाई पत्राचार गरेका छन्।
उनलाई प्रतिबन्ध लगाउने निर्णय १७ दिनअघि बसेको क्यानको बोर्ड बैठकले गरेको ढुंगानाको भनाइ छ।
क्यानको गत साउन १५ गते बसेको बोर्ड बैठकमा विभिन्न १२ वटा एजेन्डा भए पनि नेपाल प्रिमियर लिगको हिसाब बाहेकका अरु कुनै पनि निर्णय सार्वजनिक भएको थिएन।
लुम्बिनी प्रदेशका पूर्वअध्यक्ष गुरूङले क्यानलाई मुद्दा हालेको र अध्यक्षविरूद्ध विभिन्न मिडियामा नकारात्मक टिप्पणी गरेको भन्दै उनलाई प्रतिबन्ध लगाउनु पर्ने प्रस्ताव साउन १५ को बैठकमा स्वयं अध्यक्ष चतुरबहादुर चन्दले ल्याएका थिए।
यो विषयमा छलफल समेत भएको थियो। तर निर्णय सार्वजनिक भने भएको थिएन।
महाप्रवन्धक ढुंगानाले पठाएको पत्रमा भनिएको छ, ‘लुम्बिनी क्रिकेट संघका पूर्वअध्यक्ष संजय गुरुङले नेपाल क्रिकेट संघविरुद्ध मुद्दा दायर गर्नुका साथै नेपाल क्रिकेट संघका अध्यक्षविरुद्ध विभिन्न संचार माध्यमहरूमा नकारात्मक टिका टिप्पणी एवं मिथ्या आरोप लगाएको सम्बन्धमा मिति २०८२ ।४। १५ गते बसेको नेपाल क्रिकेट संघको केन्द्रीय कार्यसमितिको बैठकबाट निजलाई अर्को निर्णय नभएसम्मको लागि अम्पायरिङ लगायत कुनैपनि क्रिकेट गतिविधिहरुमा संलग्न नगराउने निर्णय भएको हुँदा निजलाई अप्पायरिङ लगायत कुनैपनि क्रिकेट गतिविधिहरुमा संलग्न नगराउनुहुन निर्देशन अनुसार अनुरोध गर्दछु।’
यसरी क्यानको निर्णयमा असहमति राखेर मुद्दा दायर गर्ने र अध्यक्षविरूद्ध टिप्पणी गर्ने व्यक्तिलाई क्यानले प्रतिबन्ध लगाएको यो पहिलोपटक हो।
यसअघि यसअघि गत चैत २२ गते लुम्बिनी प्रदेशका उपाध्यक्ष विनयराज भण्डारीले अध्यक्ष गुरूङविरूद्ध अविश्वासको पत्र दर्ता गराएका थिए।
अविश्वासको प्रस्ताव दर्ता गर्दा भण्डारीले प्रदेशका बहुसंख्यक सदस्य गुरट्ठङको विपक्षमा भएको हस्ताक्षर पनि क्यान अध्यक्ष चतुरबहादुर चन्दसमक्ष पेस गरेका थिए।
प्रदेश अध्यक्ष गुरुङलाई प्रदेशका सदस्यहरूले क्यानबाट प्राप्त बजेटको दुरूपयोग गरेको र प्रदेशभर क्रिकेटका ठोस गतिविधि सञ्चालन नगरेको आरोप लगाउँदै अविश्वासको प्रस्ताव ल्याएका थिए।
जसमा क्यान अध्यक्ष चन्दले पनि गुरुङले रकम दुरूपयोग गरेको आरोप लगाउँदै अविश्वासको प्रस्ताव 'फेस' गर्न चुनौती दिएका थिए।
गुरूङले यो कदम अवैधानिक भएको भन्दै राष्ट्रिय खेलकुद परिषदमा निवेदन दिएका थिए भने पत्रकार सम्मेलन गरेर अध्यक्ष चन्दले आफूविरूद्ध प्रतिसोध साँधेको आरोप लगाएका थिए। अध्यक्ष चन्दले प्रदेश कब्जा गर्ने रणनीतिस्वरुप प्रादेशिक क्रिकेट संघ विनियमावली ल्याएको उनको आरोप थियो।
त्यसपछि गत जेठ ३ गते लुम्बिनी प्रदेश क्रिकेट संघको विवादित विशेष साधारणसभाबाट अध्यक्ष गुरूङमाथिको अविश्वासको प्रस्ताव पारित भएको थियो।
विशेष साधारणसभामा उपस्थित सबै भोट अविश्वासको प्रस्तावमा परेको थियो। त्यसपछि उपाध्यक्ष विनयराज भण्डारी कार्यवहाक अध्यक्ष भएका थिए।
-1746009348.jpg)
