रूपन्देहीको भैरहवामा दर्ता बिना सञ्चालन गरिएका ८ वटा क्लिनिक र २ वटा प्रयोगशाला बन्द गरिएको छ।
जिल्ला स्तरीय संयुक्त अनुगमन समितिले गरेको अनुगमनमा क्रममा मापदण्ड पूरा नगरेका र दर्ताबिनै सञ्चालनमा रहेका क्लिनिक र प्रयोगशालाहरूलाई बन्द गरिएको हो।
जिल्ला अनुगमन समितिका संयोजक एवं रूपन्देहीका सहायक प्रमुख जिल्ला अधिकारी चिरञ्जीवी रानाले बुधबार भैरहवा क्षेत्रका १४ वटा निजी स्वास्थ्य संस्थामा अनुगमन गर्दा १० वटा दर्ता नगरी र मापदण्ड विपरीत सञ्चालन गरिएकोले बन्द गरिएको बताए।
‘अनुगमन गरिएका अधिकांश क्लिनिक र ल्याबहरू दर्ता नगरी गैर कानुनी रूपमा सञ्चालन गरिएको पाइएपछि बन्द गरेका हौँ,’ रानाले भने।
रानाले मानिसको स्वास्थ्यसँग प्रत्यक्ष जोडिएका स्वास्थ्य संस्थाहरू दर्ता नगरी सञ्चालन गरिएको भन्दै जिल्ला प्रशासनमा उजुरी आएपछि अनुगमन गरिएको बताए।
‘प्रशासनमा आएका उजुरीहरूलाई आधार मानेर अनुगमन गर्दा अधिकांश गैर कानुनी रूपमा सञ्चालन गरिएको पाइएको छ, कतिपय क्लिनिकले बिरामी भर्ना गरेरै उपचार गरिरहेको पनि पाइयो, त्यस्तालाई तत्कालका लागि बन्द गरेका छौँ,’ उनले भने।
रानाले दर्ता गरी मापदण्ड पूरा गरेर सञ्चालन गर्न निर्देशन समेत दिइएको बताए।
अनुगमन समितिले बन्द गरेका अधिकांश क्लिनिक फार्मेसीसँगै सञ्चालित रहेको रानाले बताए। फार्मेसी सञ्चालनको अनुमति लिए पनि क्लिनिक सञ्चालनको अनुमति नलिएको पाइएपछि बन्द गरिएको हो।
बन्द गरिएका क्लिनिकहरूमा सिद्धार्थनगरमा सञ्चालित शिवम् क्लिनिक प्रालि, महादेजस फार्मेसी, होमटाउन फार्मेसी, श्रीनगर अप्टिकल सेन्टर, र नेपाल चस्मा पसलमा सञ्चालित क्लिनिक रहेका छन्। यस्तै, जीविका मेडिकल प्रालि, श्रद्धा क्लिनिक र रोशिष प्याथोलोजी एन्ड क्लिनिक रहेका छन्।
यसै गरी लुम्बिनी प्याथोलोजी र न्यु ओम प्याथोलोजी ल्याब पनि बन्द गरिएको छ। बन्द गरिएका क्लिनिक र ल्याबहरू सिद्धार्थनगर वडा नं. ७, १२ र १३ मा सञ्चालन गरिएका थिए। बन्द गरिएका क्लिनिक र ल्याबहरू भैरहवास्थित भीम अस्पताल आसपासका हुन्।
अनुगमन समितिले यही आइतबार मात्रै दर्ताविनै सञ्चालित बुटवलका ६ वटा क्लिनिक समेत बन्द गरेको थियो। पाइलैपिच्छे क्लिनिक खोल्ने तर दर्ता र मापदण्ड पूरा नगरी सञ्चालन गर्ने परिपाटी बढिरहेको छ। नियमित र उजुरीका आधारमा अनुगमन गरी त्यस्ता संस्थाहरूलाई कानुनी दायरामा ल्याइने रानाले बताए।
