आफ्नो पसलबाट गहना नकिनेको भनेर सुन पसलेले एक जना व्यक्तिलाई सुँगुरको खोरमा लगेर थुनेको पाइएको छ।
सर्लाहीको पर्सा गाउँपालिका-५ हनुमान बजारका ५२ वर्षीय तसलिम अन्सारीलाई त्यहीँका सुन पसल चलाउँदै आएका राजेन्द्र साह सोनारले सुँगुरको खोरमा लगि थुनेर कुटपिट गरेको जिल्ला प्रहरी कार्यालय सर्लाहीले जनाएको छ।
डिएसपी सरोज राईका अनुसार घटना जेठ ३ गतेको हो।
अन्सारी छोरीको बिहेको तयारीमा जुटेका थिए। जेठ ८ गते उनको छोरीको बिहे तय भएको थियो।
सोनारले अन्सारीको छोरीको बिहेको मौका छोपेर व्यापार बढाउने जुक्ति निकाले।
उनी अन्सारीको घर गए र सम्धीले पठाएको बताएर आवश्यक गहना आफ्नै पसलबाट बनाउनुपर्ने भने।
तर अन्सारीले आफूले आवश्यक गरगहना बनाइसकेको भन्ने जबाफ थिए। सोनार त्यहाँबाट फर्केर अन्सारीको सम्धीको घर पनि पुगेको प्रहरीको अनुसन्धानबाट खुलेको छ।
त्यहाँ गएर उनले आफूलाई केटीपक्षको बाबुले पठाएको र गहना आफ्नै पसलबाट बनाउनु भनेको बताएका थिए।
त्यहाँबाट पनि गरगहना बनिसकेको जबाफ पाएपछि अन्सारी त्यसै फर्किएका थिए।
त्यसपछि केटापक्षका बाबुले फोन गरेर किन मान्छे पठाएको भनेर सोधेपछि सोनारको बदमासी अन्सारीले थाहा पाएका थिए।
सोनारले दुवैलाई भेटेर एकअर्कासँग सम्धीले पठाएको भन्ने थाहा पाएपछि विवाद उत्पन्न भएको थियो। विवाद झैझगडा नै भएको डिएसपी राईले जानकारी दिए।
त्यसपछि सोनारले आफ्नो छोरा र केही व्यक्तिलाई बोलाएर अन्सारीलाई खोरमा लगेर थुनेको पाइएको छ।
साह सोनारसहित २७ वर्षीय पप्पुकुमार यादव, २४ वर्षीय राहुल कुमार महतो, २५ वर्षीय कमलेसकुमार साहले अन्सरीलाई खोरमा थुनेको प्रहरी अनुसन्धानमा खुलेको छ।
प्रहरीले यस घटनामा ६ जनालाई पक्राउ गरी थप अनुसन्धान अगाडि बढाएको छ।
सुँगुरको खोरमा थुनेको आरोपमा शनिबार ५ जनालाई पक्राउ गरी सोधपुछ गरिएको थियो।
सोही झैझगडामा सोही ठाउँका ६५ वर्षीय दिल महम्मद अंसारीको संलग्नता भेटिएकाले उनलाई आइतबार (जेठ ४) गते पक्राउ गरिएको डिएसपी राईले बताए।
'मुस्किल समुदायको मान्छेले हिन्दु समुदायका व्यक्तिमाथि कुटपिट गरेको भन्दै अन्सारीलाई यातना दिन सुँगुरको खोरमा थुनेको खुलेको छ,' उनले भने, 'सुनबाट सुरू भएको विवाद धर्ममा गएर जोडिएको छ।'
यस घटनामा अहिलेसम्म ६ जना पक्राउ परेका छन्।
उनीहरूमध्ये राजेन्द्र, कमलेश, पप्पु, राहुलसहित चार जनालाई धर्मसम्बन्धी कसुर र अपमानजनक अमानवीय दुर्व्यवहार कसुर र तसलिम र मोहम्मदलाई अभ्रद व्यवहार मुद्दामा ५ दिन म्याद थप गरेर अनुसन्धान भइरहेको छ।
-copy-1745411477.jpg)
-1746009348.jpg)
