कारको ठक्करबाट कपिलवस्तुमा दुई जनाको मृत्यु भएको छ।
शुक्रबार बिहान कपिलवस्तुको बुद्धभूमि नगरपालिका-१ वसन्तपुरमा एउटा कारले ठक्कर दिँदा दुई महिलाको मृत्यु भएको हो।
सवेरै मर्निङवाकका लागि निस्किएका बुद्धभूमि-१ गोरुसिंगेका ६० वर्षीय शान्ता खत्री र ६५ वर्षीय तिलकुमारी रायमाझीलाई कारले ठक्कर दिएको थियो।
इलाका प्रहरी कार्यालय गोरुसिंगेका अनुसार कपिलवस्तु र अर्घाखाँचीको सिमाक्षेत्र पत्थर कोटबाट गोरुसिंगेतर्फ गइरहेको बिएबी ९५९९ नम्बरको कारले बसन्तपुरमा उनीहरुलाई ठक्कर दिएको थियो।
विहानै ६ बजे भएको दुर्घटनामा गम्भीर घाइते भएका दुवै जनाको उपचाको लागि जिल्ला अस्पताल तौलिहवातर्फ लैजाँदै गर्दा बाटोमै मृत्यु भएको इलाका प्रहरी कार्यालय गोरुसिंगेका प्रहरी निरीक्षक विराट शर्मा पौडेलले जानकारी दिए।
प्रहरीका अनुसार उनीहरू हरेक बिहान साढे ४ बजेतिर मर्निङवाकमा निस्किने गर्दथे। शुक्रबार विहानै परिवारसहित कुल पूजाबाट फर्किएको गाडीले उनीहरुलाई ठक्कर दिएको प्रहरीले जनाएको छ।
दुर्घटनापछि प्रहरीले कार चालक रूपन्देहीको सैनामैना नगरपालिका वडा नं. ५ का ३२ वर्षीय खिमराज श्रेष्ठलाई नियन्त्रणमा लिएको छ।
प्रहरी नियन्त्रणमा रहेका चालक श्रेष्ठले महिलाहरूले सडक पार गर्ने क्रममा बीचमा गएर अलमलमा परेको र कार तिव्र गतीमा भएको कारण दुर्घटना भएको बताएका छन्।
चालक र गाडी इलाका प्रहरी कार्यालय गोरुसिंगेको नियन्त्रणमा छन् भने प्रहरीले घटनाबारे अनुसन्धान गरिरहेको जनाएको छ।
-copy-1745411477.jpg)
-1746009348.jpg)
