रोल्पामा ट्रयाक्टर दुर्घटना हुँदा एक जनाको मृत्यु भएको छ।
जिल्लाको सुनछहरी गाउँपालिका-३ मौलावाङका ३३ वर्षीय बर्मान बुढा मगरको मृत्यु भएको हो।
स्थानीय डाङ्जास्थित कच्ची सडक खण्डको भित्रीगामबाट बाहिरीगामतर्फ जाँदै गरेको रा १ त ४१९८ नम्बरको ट्रयाक्टर दुर्घटना हुँदा चालक बर्मान बुढा मगरको मृत्यु भएको जिल्ला प्रहरी कार्यालय रोल्पाको सञ्चार शाखाले जानकारी दिएको छ।
दुर्घटनाबारे मंगलबार राति साढे दस बजेतिर प्रहरी चौकी गाममा स्थानीयले खबर गरेका थिए।
बर्मान दुई सय मिटर मुनि भिरमा मृत अवस्थामा फेला परेका थिए। ट्रयाक्टर भने तीन सय मिटर मुनि खोलामा खसेको अवस्थामा फेला परेको प्रहरीले जानकारी दिएको छ।
