तनहुँमा सात सय ३२ जनामा डेंगु संक्रमण पुष्टि भएको छ।
साउनयता जिल्लाका विभिन्न ठाउँका सात सय ३२ मा डेंगु संक्रमण पुष्टि भएको छ भने एकको मृत्यु भएको स्वास्थ्य कार्यालय तनहुँले जनाएको छ।
व्यास नगरपालिकामा कार्यरत इञ्जिनियर कमलप्रसाद शर्माको डेङ्गुबाट मृत्यु भएको स्वास्थ्य कार्यालयका प्रमुख शंकरबाबु अधिकारीले जानकारी दिए।
उनले डेंगु परीक्षणका लागि दमौली अस्पतालमा किट पर्याप्त मात्रामा रहेको जानकारी दिँदै संक्रमणबाट बच्न आवश्यक सतर्कता अपनाउन सबैलाई आग्रह गरे।
प्रमुख अधिकारीका अनुसार गतवर्ष जिल्लामा डेंगुबाट संक्रमित हुनेको संख्या एक सय भन्दा बढी थियो। लामखुट्टेको टोकाइबाट डेंगु हुने भएकाले यसबाट जोगिनु नै डेंगुबाट जोगिने उपयुक्त उपाय भएको उनको भनाइ थियो।
‘डेंगु संक्रमित लामखुट्टेको टोकाइले यो रोग सर्छ। यो लामखुट्टेले विशेषगरी दिउँसो मात्र टोक्ने गर्दछ र वर्षादको मौसम सुरु भएपछि डेङ्गु ज्वरोको प्रकोप बढ्न थाल्दछ,’ अधिकारीले भने, ‘एक्कासि तीनदेखि पाँचदिनसम्म ज्वरो आउनु यो रोगको मुख्य लक्षण हो। यसरी आएको ज्वरो पाँचदेखि सात दिनसम्म रहन सक्छ।’
उनका अनुसार ज्वरोका साथै बेस्सरी टाउको दुख्नु, आँखाको गेडी दुख्नु, शरीरमा डाबर आउनु, अरुचि हुनु, जोर्नी तथा मांशपेशी दुख्नु, पेट तथा आन्द्रामा गडबडी हुनुलगायत डेंगुका लक्षण हुन्।
डेङ्गुबाट बच्नका लागि पूरा शरीर ढाकिने गरी कपडा लगाउने, सधैँ राति र दिउँसो पनि झुलभित्र सुत्ने, घर वरपर तथा खेतबारीमा काम गर्दा लामखुट्टेको टोकाइबाट बच्ने मलम प्रयोग गर्नुपर्ने चिकित्सक बताउँछन्।
-1746009348.jpg)
