घरबाट पैसा चोरी गरेर घुम्न भनेर निस्किएका दुई नाबालिक दिदी-बहिनीमाथि बलात्कारको प्रयास गरेको अभियोगमा पाँच जना पक्राउ परेका छन्।
दाङको गढवा गाउँपालिका–३ मसुरियाका सहोदर १४ र १२ वर्षीया दिदी बहिनी जेठ १४ गते आफ्नै घरबाट अभिभावकको २२ हजार रुपैयाँ चोरी गरी घुम्न भनेर घरबाट निस्किएका थिए।
उनीहरू राति गढवा– ६ बुद्धज्योति टोलमा बस्ने निरुता परियारको घरमा पुगेका थिए। सोही ठाउँबाट दुई दिदी बहिनीलाई चिनजानका युवाहरूले मोटरसाइकलमा राखेर लमही नगरपालिका– ५ रातोडाँडास्थित एक जनाको कोठामा पुर्याए। सोही कोठामा पाँच जना मिलेर दुई दिदी बहिनीमाथि बलात्कारको प्रयास गरेको जिल्ला प्रहरी प्रवक्ता डिएसपी राजन गौतमले जानकारी दिए।
पीडित दुई दिदी बहिनीले जेठ १८ गते वडा प्रहरी कार्यालय लमहीमा पुगेर पीडकविरूद्ध किटानी जाहेरी दिएका थिए।
पक्राउ पर्नेमा गढवा – ५ का २० वर्षीय सुहेल खान, गढवा–६ का १८ वर्षीय दिलसान अहमद, सोही ठाउँका २ जना १६ वर्षीय किशोर र कपिलवस्तुको शिवराज नगरपालिका – ११ मैतहवा घर भई हाल गढवा–६ बस्ने ३० वर्षीय जादिब अली रहेको प्रहरीले जानकारी दिएको छ।
त्यसपछि पाँचै जनालाई पक्राउ गरि सोही दिन अदालतमा पेश गरिएको थियो।
अदालतले पाँच दिन थुनामा राखेर घटना अनुसन्धान गर्न अनुमति दिएको प्रहरी प्रवक्ता गौतमले बताए।
प्रहरीले घटना मंगलबारमात्रै सार्वजनिक गरेको हो।