नेपाली कांग्रेस रोल्पाले द्वन्द्व प्रभावितका नाममा पार्टीको लेटरप्याड, छाप र हस्ताक्षरको नक्कल गरेर अमेरिकालगायत देश गएकाहरूमाथि निगरानी गर्ने भएको छ।
रोल्पा सभापति किशोरकुमार आचार्यले बुधबार एक विज्ञप्ति जारी गर्दै कांग्रेस रोल्पा कार्यसमिति र अन्य तहहरूसमेतको नक्कली लेटरप्याड, छाप र हस्ताक्षर प्रयोग गरेको पाइएकोले त्यस प्रकृतिका घटनामाथि निगरानी भइरहेको उल्लेख गरेका छन्।
‘नेपाली कांग्रेस जिल्ला जिल्ला कार्यसमिति रोल्पा र अन्य तहहरू समेतको नक्कली लेटरप्याड, छाप र हस्ताक्षर प्रयोग गरी विभिन्न व्यक्तिहरूले आफू नेपाली कांग्रेसको साधारण सदस्य, क्रियाशील सदस्य भई नेपाली कांग्रेसको हरेक गतिविधिहरूमा सक्रिय भएको कारण द्वन्द्व प्रभावित भएको, माओवादी पार्टीका कार्यकर्ताले दुःख दिएको, धम्की दिएकोले नेपालमा बस्न नसकि जीवनरक्षाका लागि विदेश (अमेरिका लगायतका) देशमा आउनुपरेको भनि गलत सिफारिस बनाई सम्बन्धित देशमा पेस गरेको, गर्ने प्रक्रियामा रहेको बुझिएकाले सो सम्बन्धमा नेपाली कांग्रेस रोल्पाको गम्भीर ध्यानाकर्षण भएको छ,’ विज्ञप्तिमा उल्लेख छ।
यस प्रकारका गलत, भ्रामक र कानुन विपरितका कार्यहरूको बारेमा सम्बन्धित देश (विदेश) मा रहेका पार्टी जनसम्पर्क समितिको सहयोग र सम्बद्ध सबैसँग सहकार्य गरेर सत्यतथ्य पत्ता लगाउने पनि कांग्रेस रोल्पाको भनाइ छ।
‘सो सम्बन्धमा सबै देशका नेपालस्थित राजदूतावास समेतमा पार्टीको तर्फबाट कुटनीतिक पहल गरी आवश्यक प्रकृया अगाडि बढाउने भएकाले त्यस्ता गलत क्रियाकलाप नगर्न नगराउन सम्बद्ध सबैलाई यसै बिज्ञप्ती मार्फत सूचित गराइएको छ,’ विज्ञप्तिमा भनिएको छ।
-1746009348.jpg)
