नेकपा (माओवादी केन्द्र) का उपमहासचिव जनार्दन शर्माले पार्टी फुट्छ भनेर गरिएका प्रचारहरूको खारेज गर्ने बताएका छन्।
आफूलाई माओवादीबाट जति धकेल्न खोजे पनि आफू माओवादीमै रहने उनले बताए। पार्टी फुट्छ भन्ने कुरा नेतृत्वबाटै आउने गरेकोमा उनले असन्तुष्टि जनाए।
आफूले पार्टी निर्माणबारे प्रश्न उठाएबापत के सजाय भोग्नुपर्ने हो त्यसका लागि पनि तयार रहेको उनको भनाइ छ। स्थायी कमिटीमा बोल्दै कतिपय स्थायी कमिटी सदस्यहरूले उपमहासचिव शर्मालाई सचेत गराउनुपर्ने धारणा राखेका थिए।
‘मैले पार्टी निर्माणका लागि सबैका सामु प्रश्न उठाए, अरुले भित्र-भित्रै यो पार्टी बन्दै-बन्दैन भन्दै हिँडेका छन्। तर पार्टी निर्माणमा मैले प्रश्न उठाए बापत के सजाय भोग्नुपर्छ म तयार छु। पार्टी फुट्छ भन्ने दुष्प्रचार खारेज गर्छु। जति धकेल्न खोजे पनि म पार्टीमा अड्डि रहन्छु,’ उपमहासचिव शर्माले स्थायी कमिटी बैठकमा भने, ‘३१ लाखबाट ११ लाख मत झार्न मेरो कमजोरी छ भने म आत्मालोचना गर्न तयार छु। हैन भने तत् तत् ठाउँबाट आत्मालोचना गर्न आवश्यक छ।’
उनले मत घट्नुमा अध्यक्ष पुष्पकमल दाहाल 'प्रचण्ड' ले आत्मआलोचना गर्नुपर्ने संकेत गरेका हुन्।
‘३१ लाखको मत ११ लाखमा आइपुग्नुका पछाडिको कारण र दायित्व मेरै हो भने म जिम्मा लिन्छु आत्मालोचना पनि गर्छु,’ उनले भने।
पार्टीलाई समाजवादको दिशामा लैजानुको साटो सरकारमा बसेर उदारवाद र नवउदारवादको बखान गरिएको भन्दै उनले असन्तुष्टि जनाए।
‘सोही अनुसारको नीति कार्यक्रम बनायौं। केही सुधारका काम गर्न खोजे पनि त्यसप्रति सह्य भएन। हाम्रो नेतृत्वले मजदुर किसानको बाटो छोड्न खोजेको र वर्गप्रति प्रतिबद्धता टाढा भएको कारण मसँगको प्रेम घटेको हो। म अर्थमन्त्री हुँदा किसान पेन्सन ल्याएको, प्रत्येक पालिकामा ३०० जना कृषि भोलिन्टियर बनाउने र बाँझो जमीन प्रयोग गर्ने जस्तो कार्यक्रम बजेटमा ल्याएपछि त्यसलाई कार्यान्वयन नगरी हाम्रा अध्यक्ष प्रधानमन्त्री हुँदा नै खारेज गरेको कुरा म यहाँ स्पष्ट गर्न चाहन्छु। संघीयता कार्यान्वयनमा हाम्रो मूल नेतृत्वको इमान्दारिता भएको भए आज प्रदेशमा प्रहरी हुने थियो, प्रदेश बलियो भैसक्थे,’ उनले अध्यक्ष प्रचण्डप्रति नै असन्तुष्टि जनाउँदै भने।
उत्पीडित, जाति, वर्ग, क्षेत्र र समुदाय माओवादीसँग रिसाएको उल्लेख गर्दै उनले पहिचान लगायतका मुद्दाहरू बिर्सिएको पनि बताए। ‘यिनलाई ब्युझाउनु र अगाडि बढाउनुपर्छ भन्ने मैले गत स्थायी समितिमा ल्याएको प्रस्तावलाई कार्यान्वयन गर्ने क्रममै मोर्चाका सम्मेलनहरू भएका छन्,’ उनले भने।
शान्ति प्रक्रियामा आएपश्चात् र नयाँ संविधानको घोषणापश्चात पार्टीको पुनर्संरचना गर्न नसक्नु, त्यसलाई नयाँ प्रणालीमा ढाल्न नसक्नु, जनताप्रति उत्तरदायी प्रतिस्पर्धात्मकको बीचमा पार्टीलाई अगाडि बढाउनेतर्फ उन्मुख नगर्नु, केन्द्रीकृत मानसिकताबाट ग्रसित हुनु पुरानै शैलीका अपनाउनु आजको मुख्य समस्या भएको पनि उनले बताए।
‘आज हाम्रो वैचारिक अस्पष्टता, राजनीतिक लाइनको समस्या, संगठनात्मक प्रणाली र विधिका संकटहरूको कारण तमाम समस्या उत्पन्न भएका छन्। वर्ग दृष्टिकोणमा आएको विचलन, जनताका सरोकार र जनताले खोजेको आर्थिक समृद्धिको विकल्प दिन नसक्नु हाम्रो गम्भीर समस्या हो। समस्याको समाधान यिनै विषयमा गम्भीर अध्ययन, अनुसन्धान, छलफल र बहस भित्र खोज्नुपर्दछ। अन्यत्र खोजेर हामी सही मार्ग समात्न सक्दैनौं यहाँ धेरै आरोप र प्रत्यारोप भन्दा बहस गरौं,’ शर्माले भने।
साथै उनले गत केन्द्रीय कमिटी बैठकमा गरिएको सङ्कल्प र समझदारी पनि सम्झाएका थिए।
आत्मसमीक्षा आत्मालोचनासहित अगाडि बढ्ने पार्टीलाई वर्ग धरातल र सामूहिकता सहित जनसमुदायतिर फर्काउने, असारमा केन्द्रीय समिति बैठक बसी कार्यतालिकासहित ६ महिनाभित्र मंसिरमा महाधिवेशन गर्ने र बैठक एकता विजय र रूपान्तरणका रुपमा संश्लेषण गरिएको हो तर त्यो अनुसार भयो कि भएन भनेर उनले प्रश्न गरे।
उनले असारसम्म अभियान सञ्चालन गर्ने, जबस मोर्चाको राष्ट्रिय सम्मेलन गर्ने, एकता र ध्रुवीकरण र समाजवादी मोर्चा प्रभावकारी बनाउने सरकारतिर फर्केर नहेर्ने सदनलाई प्रभावकारी बनाउने कुरा थियो तर कार्यान्वयनको अवस्था नाजुक रहेको उनको भनाइ छ।
‘प्रारम्भमा अभियान प्रभावकारी भयो, मधेस प्रदेशपछि घट्दै गएर पश्चिममा पुग्दा कार्यकर्ता केन्द्रित मात्र हुन पुग्यो, नेतामुखी हुनपुग्यो, टिम परिचालनमा मनोमानी गरियो र अभियानमा जान प्रतिबन्ध लगाइयो,’ उनले भने।
यी समस्याको प्रारम्भ कहाँबाट र कोबाट भयो भन्दै उनले निष्कर्षका रूपमा कार्यविभाजनमा नै समस्या भएको बताए।
‘अध्यक्षले गुटका दृष्टिकोणले कार्यविभाजन गर्नुभयो। एकताबाट आएका र अन्य सिनियरहरूलाई ह्यूमिमिलेट गरियो। विभेदकारी र पूर्वाग्रही कार्यविभाजन भयो। केन्द्रीय समिति बैठकलगत्तै अध्यक्षले धेरै ठाउँमा महाधिवेशन गर्दैन भन्नुभयो,’ उनले भने।
यो पनि: जनार्दनलाई पन्छाउन प्रचण्डको कसरत, दुई पटक भनिसके– तपाईं पार्टी छाडेर जानुस्!
-1746009348.jpg)
