कैलालीमा १७ वर्षीया किशोरीको हत्या भएको छ।
बर्दगोरिया गाउँपालिका–३ की १७ वर्षीया याचना सेजुवालको हत्या आरोपमा बर्दगोरिया १ का ३३ वर्षीय निरज साउद पक्राउ परेका छन्।
निरज र याचना बारगोर्दिया-१ कै 'राजधानी सेकुवा एन्ड म:म सेन्टर'मा काम गर्थे। निरज होटलका कुक थिए। याचनाले १५ दिनअघि मात्रै सो होटलमा वेटरको काम थालेकी थिइन्।
सोही होटलको भान्साकोठामा शनिबार निरजले याचनाको घाँटीमा चक्कु प्रहार गरेका थिए।
जिल्ला प्रहरी कार्यालय कैलालीका प्रवक्ता डिएसपी राजकुमार सिंहका अनुसार चक्कु प्रहारबाट गम्भीर घाइते भएकी याचनाको शनिबार धनगढीस्थित निसर्ग अस्पतालमा उपचार क्रममा मृत्यु भएको हो।
निरजलाई प्रहरीले शनिबार नै पक्राउ गरी सोधपुछ र प्रारम्भिक अनुसन्धान गरिसकेको छ। आइतबार म्याद थप गरी बाँकी अनुसन्धान अगाडि बढाउने तयारी छ।
डिएसपी सिंहका अनुसार दुई जनाबीच १०/१५ दिन अघि मात्रै भेट भए पनि आफूहरू प्रेममा रहेको भनेर निरजले बयान दिएका छन्।
निरजका दुई छोरी छन्। श्रीमतीसँग कानुनी रूपमा सम्बन्धबिच्छेद भइसकेको उनले बताएका छन्।
होटलमा काम गर्दा छोटो समयमै नजिकिएका उनीहरूबीच प्रेम र चाँडै विवाह गर्ने सहमति भएको भनेर निरजले प्रहरीसमक्ष प्रारम्भिक बयानमा भनेका छन्।
प्रहरीका अनुसार आफ्नो दुइटी छोरी रहेको र श्रीमतीसँग पारपाचुके भइकेको कुरा पनि निरजले याचनासँग भनेका थिए।
वेटरको काम गरे पनि याचना बेलाबेला निरजलाई भान्साको काम पनि सघाउने गर्थिन्।
सोही क्रममा शनिबार बिहान भान्सा कोठामै उनीहरूबीच सामान्य विवाद भएको डिएसपी सिंहले बताए।
'बिबाह गर्ने निर्क्योल भइसक्दा पनि उनी फोनमा अरू व्यक्तिहरूसँग बोल्ने गरेको विषयमा विवाद भएको थियो,' निरजको भनाइ उद्धृत गर्दै डिएसपी सिंहले भने।
'निरजले त्यसो नगर्नू भनेपछि याचनाले कुरा पनि गर्न हुँदैन भन्ने जबाफ दिएकी थिइन्। त्यसपछि निरजले किचनमै भएको चक्कुले एक्कासि उनीमाथि प्रहार बयान दिएका छन्,' डिएसपी सिंहले भने।
चक्कु प्रहार हुँदा भान्सा कोठामा निरज र याचना मात्रै थिए।
याचना गम्भीर अवस्थामा भुइँमा लडेपछि होटेलका मालिक रामा शाहीले घटनाबारे थाहा पाएका थिए। त्यसपछि उनले प्रहरीलाई खबर गरेका थिए।
शाहीले २० दिनअघि मात्रै उक्त होटल चलाउन थालेका थिए। त्यसअघि अशोक चौधरीले त्यो होटल चलाउँथे। निरज अशोकले चलाउँदादेखि नै सो होटलमा कुकको काम गर्थे।
घटनाबारे थप अनुसन्धान भइरहेको प्रहरीले जनाएको छ।
-1746009348.jpg)
