इरानले आक्रमण जारी रहेकै अवस्थामा अमेरिकासँग वार्ता नहुने अडान राखेको छ।
युरोपेली र इरानी अधिकारीबीच शुक्रबार जेनेभामा भएको छलफलमा इरानले यथास्थितिमै अमेरिकासँग आणविक हतियारबारे वार्ता नहुने बताएका हुन्।
छलफलमा युरोपेली अधिकारीहरूले इरानलाई अमेरिकासँगको वार्ता पुनः सुरू गर्न सुझाव दिएका थिए। जबाफमा इरानका विदेशमन्त्री अब्बास अराघ्चीले इसराइली आक्रमण जारी रहेसम्म वार्ता सुरू गर्न नसकिने जबाफ दिएको अन्तर्राष्ट्रिय समाचार संस्था रोयटर्सले जनाएको छ।
जेनेभामा बेलायत, फ्रान्स, जर्मनी र युरोपेली संघका विदेशमन्त्रीहरूले इरानी विदेशमन्त्रीसँग वार्ता गरेका थिए।
‘यदी इसराइल तत्काल आक्रमण रोक्छ भने हामी आणविक हतियारसम्बन्धमा वार्ता गर्न सक्छौ। आक्रमण र वार्ता सँगै अघि बढ्दैन,’ इरानी विदेशमन्त्री अराघ्चीले भने।
उनले इरानको आणविक कार्यक्रम हिंसाका लागि नभइ शान्तिका लागि भएको पनि बताए। त्यस्तो कार्यक्रममाथि आक्रमण गरेर इसराइलले अन्तर्राष्ट्रिय कानुन तोडेको आरोप लगाए। उनले इसराइलले आक्रमण सुरू गरेपछि इरानले आत्मरक्षा गरेको पनि दाबी गरे।
इसराइली डिफेन्स फोर्सका प्रमुख इयाल जमिरले भिडिओ सन्देशमार्फत इरानलाई लामो युद्ध र कठिन दिनहरूका लागि तयार हुन चेतावनी दिएका छन्।
'म यो कुरालाई पूर्णरूपमा स्पष्ट पार्न चाहन्छु कि इरानको रक्षा क्षमता कुनै पनि हालतमा सम्झौताको विषय होइन,’ जबाफमा इरानी विदेशमन्त्री अराघ्चीले भने।
जेनेभामा युरोपेली नेताहरूसँग इरानको वार्तालाई अमेरिकी राष्ट्रपति डोनाल्ड ट्रम्पले आलोचना गरेका छन्।
‘इरान युरोपसँग होइन, हामीसँग वार्ता गर्न चाहन्छ। युरोपले यो समस्या समाधान गर्न सक्दैन,’ ट्रम्पको भनाइ उद्धृत गर्दै रोयटर्सले लेखेको छ।
ट्रम्पले वार्ताबाट समस्या समाधानका लागि इरानलाई दुइ साताको समय दिएका छन्। त्यसपछि अमेरिका आफै इरानविरूद्ध आक्रमण गर्ने संकेत ट्रम्पले गरेको भनेर विभिन्न अन्तर्राष्ट्रिय सञ्चारमाध्यमहरुले जनाएका छन्।
इसराइलले पनि इरानविरूद्धको आक्रमणमा प्रत्यक्ष संलग्न हुन भनेर अमेरिकासँग आग्रह गरिरहेको छ। किनभने इरानका आणविक कार्यक्रमहरू नष्ट बनाउने हतियार केबल अमेरिकासँग मात्रै छ।
पढ्नुसः अमेरिकाको जिबियू–५७ बंकरभेदी बम के हो? कसरी गर्छ यसले काम?
ट्रम्पले इरानले विनाशर्त आत्मसमर्पण गर्न इरानलाई चेतावनी पनि दिएका थिए। इरानले यसअघि वार्ताका लागि तयार भएको तर ट्रम्पले भनेजसरी विनासर्त आत्मसमर्पणको प्रस्ताव भने अस्वीकार गरेको थियो।
त्यसपछि इसराइल र अमेरिका दुवैसँग राम्रो सम्बन्ध भएको युरोपेली नेताहरुले इरानसँग वार्ता अगाडि बढाएका थिए।
बेलायतका विदेशमन्त्री डेभिड लामीले अमेरिकाले मध्यपूर्वको संकट समाधानका लागि दिएको छोटो समयको अवधि खतरनाक र गम्भीर रहेको बताएका छन्।
त्यस्तै फ्रान्सक विदेशमन्त्री जिन-नोएल बारोले सैन्य आक्रमणबाट इरानको आणविक समस्याको स्थायी समाधान नरहेको बताएका छन्। उनले इरानी सत्ता परिवर्तन थप खतरनाक हुने समेत बताएको भनेर बिबिसीले लेखेको छ।
यसबीच इरान र इसराइलबीचको आक्रमण प्रत्याक्रमण शृंखला दोस्रो सातामा प्रवेश गरेको छ।
गत साताको शुक्रबारदेखि इसराइलले इरानमाथि आक्रमण थालेको थियो। त्यसयता इरान र इसराइल दुवैले एक अर्काका सैन्य र भौतिक संरचनामा आक्रमण गरिरहेको छ।
इसराइलले शनिबार इरानमाथि नयाँ चरणको आक्रमण सुरू भएको उद्घोष गरेको छ। इसराइली सहर तेल अविभमा पनि विस्फोटका ठूला आवाजहरू सुनिएको अन्तर्राष्ट्रिय सञ्चारमाध्यमहरुले जनाएका छन्। त्यहाँबा ठुल्ठूला भवनहरूमा आगलागी भएको भनिएको छ।
