नेपाली कांग्रेस शिक्षा विभाग प्रमुख नैनसिंह महरले नेपाल शिक्षक महासंघको आह्वानमा भइरहेको शिक्षक आन्दोलन एक-दुई दिनमै निष्कर्षमा पुग्ने बताएका छन्।
चैत २० गतेदेखि शिक्षकहरू काठमाडौंकेन्द्रित आन्दोलनमा छन्।
महरले पनि शिक्षक आन्दोलनका अगुवाहरूसँग पटक पटक छलफल गर्दै आएका छन् भने शिक्षकहरूका विगतका सहमति कार्यान्वयन गर्न प्रधानमन्त्री केपी शर्मा ओलीले अग्रसरता देखाउनुपर्ने उनको भनाइ छ।
उनले आन्दोलनरत शिक्षक महासंघसँगको वार्ता एक दुई दिनमै निष्कर्षमा पुग्ने पनि बताएका छन्।
‘शिक्षकका माग सम्बोधनका लागि सरोकारवाला निकायसँग सरकार र पार्टीकोहरू बीचमा गम्भीर छलफल भइरहेको छ, नियमित भर्ना र १२ कक्षाको परीक्षा प्रभावित नहुने गरी वार्ता सफल पार्ने कोसिस भइरहेको छ,’ महरले भने।
सानेपामा सोमबार विद्यालय शिक्षा विधेयकका बारेमा शिक्षा विभागको आधिकारिक धारणा तय गर्ने क्रममा भ्रातृ तथा शुभेच्छुक संस्थाका प्रमुख तथा प्रतिनिधिसँगको छलफलमा महरले छिट्टै शिक्षकहरूसँग सरकारको वार्ता निष्कर्षमा पुग्ने बताएका हुन्।
उनले सरोकारवालाहरूबीचको वार्ता सकारात्मक रहेकाले एक/दुई दिनमै निकास निस्कने पनि बताए।
'चैत २० यता शिक्षकहरू निरन्तर प्रदर्शनमा हुनुहुन्छ। यसले लाखौं विद्यार्थी मारमा परेका छन्। यस्तो अवस्थामा सरकारसँग शिक्षकहरूको वार्ता सकारात्मक रूपमा अघि बढिरहेकाले छिट्टै निकासमा पुर्याउनुपर्छ। यो संवेदनशील घडीको आन्दोलनरत शिक्षक समुदायले बुझ्ने कुरामा पनि हामी विश्वस्त छौं। छलफल सकारात्मक भएर मात्र हुँदैन, निष्कर्षमा पुग्नु जरूरी छ,' महरले भने।
