नेकपा (एकीकृत समाजवादी)की नेता रामकुमारी झाँक्रीले शिक्षकहरुले काठमाडौंको सडकमा गर्दै आएको आन्दोलनको आलोचना गरेकी छन्।
शनिबार सामाजिक सञ्जाल फेसबुकमा स्टाटस लेखेर झाँक्रीले शिक्षकहरुको आन्दोलन, उनीहरुको माग र अडानलाई लिएर आलोचना गरेकी हुन्।
२०८० असोजमा सरकारसँग भएको सहमति कार्यान्वयन शिक्षकहरूको मूल माग हो। त्यसका लागि विद्यालय शिक्षा ऐन तत्काल जारी गर्नुपर्ने उनीहरुको अडान छ।
विद्यालय शिक्षा ऐन बर्खे अधिवेशनबाट टुंग्याउने प्रतिबद्धता सरकारको छ। सो अनुसार उक्त विधेयक अहिले संसदको उपसमितिमा छलफल भइरहेको छ।
शुक्रबार राति प्रधानमन्त्री केपी शर्मा ओलीले शिक्षकहरुको आन्दोलनको नेतृत्व गरिरहेको शिक्षक महासंघका पदाधिकारीलाई बालुवाटार बोलाएर छलफल गरे। तर आन्दोलन स्थगित गरी शिक्षकहरू नियमित काममा फर्किने वातावरण तय भएन।
छलफलपछि शिक्षक महासंघका अध्यक्ष लक्ष्मीकिशोर सुवेदीले आन्दोलन नरोकिने घोषणा गरे।
शिक्षकहरु चैत २० गतेदेखि काठमाडौंकेन्द्रित आन्दोलनमा छन्।
नेता झाँक्रीले शिक्षकहरुले लामो समयदेखिको आन्दोलनको कटाक्ष गर्दै रमिता बढी भयो भनेकी छन्। उनले यतिका दिन सडकमा आउने, गाउने र जाने काम भएको बताइन्।
शिक्षकहरुले सरकारसँग वार्ता र संवादका लागि अस्वीकार गरेको विषयमा पनि झाँक्रीले कटाक्ष गरिन्।
'शिक्षक, सरकार र संसदको बिचमा समन्वय र संवाद गराउनु पर्यो भनेर धेरै कोणबाट उहाँहरूसंग कुरा पुराउने, संवाद गर्ने प्रयास पनि गरें। तर उहाँहरू त संवाद नै नगर्ने रे? शिक्षा ऐन ऐले पास हुनुपर्छ अन्यथा हामी विधालय फर्कदैनौ भन्नुहुन्छ। के ऐन सडकबाट पास हुने हो र?,' उनले भनेकी छन्।
झाँक्रीले विधेयक पास गर्ने संसद र सरकारको आफ्नो कानूनले निर्धारण गरेको प्रक्रिया हुने पनि बताइन्।
'के सडकको रमितामा पुगेका सांसद, पूर्वमन्त्री, पूर्वप्रम र नेताहरुले सडकबाटै ऐन पास गर्दिनुहुने रहेछ? समितिमा दफावार छलफलमा रहेको विधेयक पास नभई फर्कन्नौं भन्न मिल्छ? राज्यको तलव खाएका शिक्षक कर्मचारीले?,' उनले प्रश्न गरिन्।
निजी विद्यालयहरूले विद्यार्थी भर्ना गरेर पठनपाठन सुरू गरिसकेको अवस्थामा भर्नाको समयमा विद्यालय बन्द गरेर लाखौं विद्यार्थीहरूको भविष्य अन्योल बनाएको झाँक्रीले बताएकी छन्।
विद्यालयको गुणस्तर र नतिजा सुधारको विषयमा भने शिक्षकहरु चिन्तित नभएको उनको आरोप छ।
'पढाएका कयौ विद्यालयको BLE को रिजल्ट शून्य छ। के यो विषयमा चिन्चित हुनहुन्छ? आगामी दिनमा सुधार्न के गर्नुपर्छ भनेर कतै छलफलमा रूची देखाउनु भएको छ?,' उनको प्रश्न छ।
झाँक्रीले ऐन आउने विषयमा सरकारले प्रतिबद्धता जनाइसकेको पनि स्मरण गराएकी छन्।
'ऐन पहिले नै आउनुपर्ने थियो, आउन सकेन। अब आउँछ। विधेयक समितिमा दफावार छलफलमा छ। विधेयक संसोधनसहित पास हुने भएकोले पनि छलफलले समय लिएको हो। अब भने विधेयक समितीबाट पास हुने प्रक्रिया छ। समितिले पास गरेपछि हाउसमा जान्छ,' उनले भनिन्।
त्यसकारण आन्दोलनरत शिक्षकहरुलाई आफ्नो जिम्मेवारी वहन गरेर विद्यालय फर्कन झाँक्रीको आग्रह छ।
'आफ्नो जिम्मेवारी बहन गर्नुस। सरकार र संसदलाई विश्वास गर्नुस। जिम्मेवार नेता साथिहरू! ऐक्यवद्धताको रमिता तपाईहरू पनि नगर्नुस बल र कोर्ट दुबै तपाईकै खुट्टामा छ,' उनले भनिन्।
