नेपाली काँग्रेसका सांसद डा. शेखर कोइरालाले संविधान पुनरवलोकनमा ढिलाइ गर्न नहुने बताएका छन्।
शनिबार काठमाडौंमा आयोजित कार्यक्रममा बोल्दै कोइरालाले संविधान संशोधन गर्न जति ढिलाइ हुन्छ त्यति नै सडक आक्रोशित हुने बताएका हुन्।
'यो सरकारले खासगरी संविधान पुनरावलोकन, संशोधन गर्ने कुरा गरेको छ । यसमा अब ढिलाइ नगरौँ । जति ढिलाइ हुन्छ, त्यति सडक आक्रोशित हुन्छ,' उनले भने।
उनले भ्रष्टाचार र दण्डहिनता बढेको पनि बताउँदै त्यसलाई नियन्त्रण गरेर अघि बढ्नुपर्ने बताए।
कोइरालाले सरकारको कामकारबाहीमा कांग्रेसले खबरदारी गर्नुपर्ने पनि बताए।
किनभने हाम्रो प्रतिष्पर्धी कुनैपनि ठाउँमा एमाले हुन्छ। हामी अहिले एमालेसित सहकार्य गरेर अघि बढिरहेका छौँ । यसलाई म खराब भनिरहेको छैन । तर यो सरकारले कतै गलत, कमी कमजोरी गरिरहेको छ की भनेर हामीले खबरदारी गरिरहनुपर्छ । त्यो नगरे नेपाली काँग्रेस अफ्ठ्यारोमा पर्छ,' उनले भने।
कोइरालाले अमेरिकाको ट्यारिफ नीति तेस्रो विश्वयुद्ध भन्दा पनि ठूलो हुने खतरा रहेको पनि बताए। त्यसकारण नेपालले पनि आफ्नै खुट्टामा उभिनसक्छ भन्ने सोच राखेर अघि बढ्न जरुरी रहेको बताए। -नेपाल न्युज बैंक
