नेकपा एमाले र नेपाली कांग्रेसको चितवनको दुईदलीय संयन्त्रले प्रधानमन्त्री केपी शर्मा ओलीलाई भेटेर चितवनको विकासका लागि पर्याप्त बजेट विनियोजन गर्न माग गरेको छ।
संयन्त्रले चितवनको विकासका लागि तत्कालीन र दीर्घकालीन रुपमा सम्पन्न गर्नुपर्ने योजनाहरु प्रस्तुत गर्दै आगामी आर्थिक वर्षमा बजेट विनियोजन गर्न माग गरेको हो।
तत्काल सुरु गर्नुपर्ने र निरन्तरता दिनुपर्ने योजनाहरुमा भरतपुर विमानस्थल विस्तार, नारायणी, राप्ती र रिउ नदीमा तटबन्ध, ठोरीदेखि माडी–धुर्बघाट–नारायणी नदी हुँदै नवलपरासीतर्फ जाने तराई-मधेस हुलाकी सडक, चितवन राष्ट्रिय निकुञ्जभित्र पर्ने माडीको बनकट्टादेखि भरतपुरको जगतपुरसम्मको सडकलाई पक्की बनाउने, भरतपुर महानगरपालिका र कालिका नगरपालिकाको चक्रपथ, चितवन जिल्ला स्तरीय चक्रपथको विस्तृत संभावना अध्ययन गर्ने छन्।
त्यस्तै भण्डारा–मलेखु चेपाङ मार्ग, भोर्ले–दाहाखानी–उपरदाङगढी सडक, वीरेन्द्रनगर–किरणटार–ठकुरी भञ्ज्याङ सडक, लोथर–सौराहा–गोलाघाटसम्म राप्तीमा तटबन्ध गरी पर्यटकीय सडक निर्माण, शक्तिखोर औधोगिक क्षेत्रको पूर्वाधार निर्माण, माडीका धार्मिक तथा पर्यटकीय गन्तव्य, देवघाटधानलाई व्यवस्थित गराउन पूर्वाधार निर्माण, कृषि उपजको भण्डारण तथा बजारीकरणलगायत छन्।
दुई दलीय संयन्त्रले सप्तगण्डकी बहुउद्देश्यीय परियोजनालाई दीर्घकालीन योजनाकारुपमा अघि बढाउन माग गरेको छ। नारायण नदीको पानीबाट विद्युत निकाल्ने यो महत्वकांक्षी योजनाको विषयमा बेला–बेलामा कुरा उठ्ने, हराउने हुँदै आएको छ।
यो परियोजनाको विस्तृत अध्ययन गरी कार्यान्वयन गर्नुपर्ने माग राखिएको नेकपा एमाले चितवनका अध्यक्ष कमलराज पाठकले जानकारी दिए।
त्यस्तै, त्रिशूली–हुग्दी–शक्तिखोर बहुउद्देश्यीय योजनाको विस्तृत अध्ययन गरी कार्यान्वयन गर्नुपर्ने, नारायणघाट–मुग्लिन सडकको वैकल्पिक मार्गको विस्तृत अध्ययन गरि कार्यान्वयन गर्नुपर्ने माग प्रधानमन्त्रीसँग राखिएको अध्यक्ष पाठकले जानकारी दिए।
नेकपा एमालेका अध्यक्ष पाठक र नेपाली कांग्रेसका सभापति राजेश्वर खनालको हस्ताक्षर गरेर संयन्त्रले भारत र चीन जोड्ने छोटो बाटो केरुङ–मलेखु–भरतपुर–माडी–ठोरी लोकमार्ग निर्माण गर्न विस्तृत अध्ययन गरि कार्यान्वयन गर्न, भरतपुर अस्पताललाई मेडिकल कलेजकोरुपमा विकास गर्न, विपी कोइराला मेमोरियल क्यान्सर अस्पताललाई क्यान्स अध्ययन प्रतिष्ठानका रुपमा विकास गर्न, नेपालमै रोजगारीको दिन सक्नेगरि दक्ष जनशक्ति तयार गर्न चितवनमा बहुप्राविधिक शिक्षालय एवम् नवप्रवर्तनका लागि चितवन आविश्कार केन्द्र स्थापना गर्न प्रधानमन्त्रीसँग माग गरेको छ।
अध्यक्ष पाठकले बागमती प्रदेशको भारतसँग जोडिने भन्सार नाका नभएकाले लिच्छविकालीन समयमा भारतसँगको व्यापार नाकाकोरुपमा रहेको सोमेश्वरगढी नजिक पर्ने (माडीको बसन्तपुर बजारबाट ) ठाउँबाट भारतसँग जोड्ने नाका विकास गर्नुपर्ने माग राखिएको बताए।
