राष्ट्रिय प्रजातन्त्र पार्टी (राप्रपा) ले बाँकेको नेपालगञ्जस्थित बिपी चोकमा रहेको बिपी कोइरालाको सालिकमा कपडाले छोपेको घटनामा भवितव्य भन्दै माफी मागेको छ।
राप्रपा नेपालगञ्ज नगर कार्यसमितिले चैत २३ गते बिपी चोकमा राँके जुलुस निकालेको थियो।
राप्रपा नगर कार्यसमितिका अध्यक्ष हुकुम सिंह केसीले आइतबार विज्ञप्ति जारी गर्दै 'बिपी चोकमा भएको राँके जुलुस कार्यक्रममा निर्वाचित पूर्वप्रधानमन्त्री बिपी कोइरालाको सालिकमा कपडाले मुख छोपिएको तस्बिर भाइरल भएकोमा उक्त तस्बिर हेर्दा नगर कार्यसमितिको ध्यानाकर्षण भएको' उल्लेख गरेका छन्।
राप्रपा वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणाको रिहाइका लागि राप्रपाले नेपालगञ्जमा राँके जुलुस निकालेको थियो। उक्त जुलुसलाई प्रहरीले हस्तक्षेप गरेको पनि विज्ञप्तिमा उल्लेख छ।
‘हाम्रो नेताहरूको रिहाइको मागका लागि मात्र गरिएको राँके जुलुसमा भवितव्य रूपमा कहाँ, कसरी उक्त घटना भएको हो, हाम्रो मनसाय कुनै पनि दल र व्यक्ति विशेषलाई होच्याउने नभएको हुँदा जननिर्वाचित पूर्वप्रधानमन्त्री बिपी कोइरालाप्रति सधैं सम्मान र विश्वास रहेको छ,’ विज्ञप्तिमा उल्लेख छ, ‘उक्त भवितव्य घटनाबाट कुनै पनि दल र व्यक्तिको आस्थाप्रति ठेस पुगेकोमा नगर कार्यसमिति क्षमाप्रार्थी छौं।’
नेपालगञ्जस्थित बिपीको सालिकमा मोसो दलेको भन्ने कुरा सही नभएको प्रहरीले बताएको थियो। बाँकेका प्रहरी प्रवक्ता डिएसपी दीपक पातलीले प्रहरीले आगो निभाउने क्रममा उडेर गई कपडाको टुक्रा सालिकमा टाँसिएको विषयलाई लिएर मोसो दलेको भन्नु गलत भएको बताएका थिए।
राप्रपा प्रवक्ता मोहन श्रेष्ठले राप्रपा इतिहासको सम्मान गरौं भन्ने पार्टी भएको उल्लेख गर्दै पार्टीका कार्यकर्ताले अराजक काम नगर्ने बताएका थिए।
‘यस्तो काममा कुन कुन पार्टीका मान्छेहरू संलग्न हुन्छन् भन्ने दुनियाँलाई थाहै छ त,’ उनले भनेका थिए, ‘इतिहासको कुनै कालखण्डमा राष्ट्र निर्माणमा योगदान दिने व्यक्तिहरू हाम्रा लागि सम्मानयोग्य छन्। बिपीप्रति सम्मान छ। तीनकुनेमा जस्तै नेपालगञ्जमा पनि घुसपैठ भयो कि!’
यस्तो छ विज्ञप्ति:
