जनमत पार्टीले अनुशासन समिति संयोजकसमेत रहेका पार्टी उपाध्यक्ष दीपककुमार साहलाई निलम्बन गरेको छ।
सुनसरीका साहलाई ६ महिनाका लागि पार्टीबाट निलम्बन गरिएको जनमत पार्टीले जनाएको छ।
फागुन २१ गते उपाध्यक्ष साहलाई पार्टी अनुशासन समितिले स्पष्टीकरण सोधेको थियो। उनले फागुन २७ गते बुझाएको स्पष्टीकरण चित्तबुझ्दो नभएको भन्दै ६ महिनाका लागि निलम्बन गरिएको अनुशासन समितिको भनाइ छ।
स्पष्टीकरण सोधेपछि उपाध्यक्ष साहले अध्यक्ष सिके राउतविरूद्ध फेसबुकमा लेख्न लगाएकोसमेत आरोप छ। साथै अनुशासन समितिलाई नै ४८ घन्टे अल्टिमेटम दिएर धम्क्याएको आरोप छ।
‘तपाईंले जनमत पार्टीलाई भोट नहालेको स्वीकार गर्नु भएकै छ, राष्ट्रिय उपाध्यक्षको पदमा बसेर जनमत पार्टीलाई भोट नहाल्नु अक्षम्य अपराध हो। पार्टी अध्यक्षज्यूको पारिवारिक मामिलामा तपाईंकी श्रीमतीले प्रहरीमा उजुरी दिन गएको, पत्रकारकहाँ अन्तर्वार्ता दिँदा सँगै रहेको सबै प्रमाणित तथ्य हुन्। पार्टी अध्यक्षज्यूको पारिवारिक मामिलामा यसरी षडयन्त्र गर्ने र त्यस पारिवारिक विषय उठाएर उल्टा कार्यकर्ता र विभिन्न ठाउँमा अध्यक्षज्यूलाई हटाउन लबी गर्नु अक्षम्य अपराध हो,’ निलम्बन गरेको पत्रमा भनिएको छ, ‘पार्टीको विधान २०७५ को धारा ३९ (क) को उपधारा १, २, ३, ५, ६, १० र ११ उल्लंघन गरेको देखिएकोले तपाईंलाई पार्टीको सबै पदबाट ६ महिनाका लागि निलम्बन गरिने व्यहोरा सूचित गरिन्छ।’
उपाध्यक्ष तथा अनुशासन समिति संयोजक नरेन्द्रप्रसाद चौधरी र केन्द्रीय सचिवसमेत रहेकी अनुशासन समिति सदस्य सचिव अनिताकुमारी मण्डलले उपाध्यक्ष साहलाई निलम्बन गरेको पत्रमा हस्ताक्षर गरेका छन्।
यो पनि: पार्टी फुटाउन शक्ति केन्द्रसँग साठगाँठ आरोपमा जनमतका उपाध्यक्ष र कोषाध्यक्ष निलम्बनमा
