गृहमन्त्री रमेश लेखकले चैत १५ गते तीनकुनेमा राजावादीहरुले गरेको हिंसात्मक प्रदर्शनमा सुरक्षाकर्मीले संयमता अपनाएको बताएका छन्।
शुक्रबार प्रतिनिधि सभाको राज्यव्यवस्था समितिलाई तीनकुने घटनाबारे जानकारी गराउँदै गृहमन्त्री लेखकले प्रदर्शनको नेतृत्व गरेका व्यक्तिहरूको उद्दण्डका बाबजुद सुरक्षाकर्मीले संयमता अपनाएको बताएका हुन्।
'भीडको नेतृत्वकर्ताको उद्दण्डताका आधारमा सुरक्षाकर्मीले संयमता नअपनाएको भए थप क्षति हुने थियो। जस्तो खालको उद्दण्डता र आपराधिक गतिविधि भयो त्यसमा संयमता नअपनाएको भए थप क्षति हुने थियो,' उनले भने।
यस्ता घटनामा सुरक्षा निकायले नियन्त्रण गर्न बल प्रयोग नगरेमा पनि आलोचना हुने र बल प्रयोग गरेर नियन्त्रण गर्न खोजे पनि आलोचना हुने गरेको लेखकको भनाइ थियो ।
हिंसात्मक गतिविधिलाई विषयान्तर गर्न र ढाकछोप गर्नका लागि बल प्रयोग गरेको भनेर चर्चा भइरहेको गृहमन्त्री लेखकको भनाइ थियो ।
'यसरी गरिएका हिंसात्मक गतिविधिलाई विषयान्तर, ढाकछोफ गर्ने र हामीले ठिक गरेका थियौं भनेर पुष्टि गर्न विभिन्न खालका भ्रम फैलाइएको छ । कहाँबाट टियरग्यास फाल्यो भनेको छ, कहाँ के गरेको भनेको छ,' उनले भने ।
बैठकमा मन्त्री लेखकले संविधान च्यात्ने र व्यवस्था फाल्ने गतिविधि स्वीकार्य नहुने पनि स्पष्ट पारे ।
'संविधान च्यात्ने र व्यवस्था फाल्ने गतिविधि निस्तेज पारिनेछ,' उनले भने, 'त्यस्तो हुन्छ आन्दोलन, प्रदर्शन ? त्यै हो लोकतन्त्रको उपयोग गरेर आलोचना गर्ने कुरा ? त्यसरी नै यो संविधान जोगाउन सक्छौं ?' उनले भने।
