नेपाली कांग्रेसका प्रवक्ता प्रकाशशरण महतले अप्ठ्यारो परिस्थितिमा पन्छिने दलबाट अधिकारको रक्षा नहुने बताएका छन्।
शुक्रबार काठमाडौंमा नेपाल वित्तीय संस्था कर्मचारी संघको ३५ औं स्थापना दिवसका अवसरमा आयोजित कार्यक्रमलाई सम्बोधन गर्दै महतले सहज परिस्थितिमा मात्रै अगाडि आउने दलहरूले अधिकारको रक्षा गर्न नसक्ने बताएका हुन्।
कांग्रेस जस्तोसुकै परिस्थितमा पनि अडिग रहने पार्टी रहेको महतले दाबी गरे।
'कांग्रेस अप्ठ्यारो र जस्तो अवस्थामा पनि अडिग रहन्छ । अफ्ठयारो पर्दा कहाँ हो कहाँ र सहज भए अघि आउने पार्टीहरुले अधिकारको रक्षा गर्न सक्दैनन्,' उनले भने।
सत्तामा रहँदा र सत्ता बाहिर रहँदा पनि कांग्रेसले बोल्नुपर्ने कुरा बोल्ने उनले बताए।
'सत्ता बाहिर भएपनि र सत्ताभित्र भएपनि बोल्नुपर्ने र लागेको कुरामा बोल्छ । त्यसमा विचार गर्नुपर्छ पनि भन्छ । हामी जिम्मेवार पार्टी हौँ,' उनले भने।
उनले अरू राजनीतिक दलमा पनि मेहनत, प्रतिबद्धता र इमानदारिता आवश्यक रहेको बताए।
