नेकपा (माओवादी केन्द्र) की सांसद छिरिङ ल्हामु लामाले जुम्लाको गुठीचौर गाउँपालिकाका ३८ वर्षीय गणेश लामा बेपत्ता भएको बताएकी छन्।
मंगलबार अन्तर्राष्ट्रिय सम्बन्ध तथा पर्यटन समितिको बैठकमा बोल्दै उनले गणेश मेला भर्न गएका बेला तिब्बतबाट बेपत्ता भएको र उनलाई मानिसजस्तै स्वरूपको प्राणी (बनमान्छे) ले लगेको दाबी गरेकी हुन्।
‘जुम्ला गुठीचौर गाउँपालिका वडा नम्बर १ का ३८ वर्षका गणेश लामा सम्पर्कमा आएका छैनन्। मेला भर्न गएका बेला तिब्बतबाट बेपत्ता भएका थिए। उनलाई बनमान्छेले लगेको उनका साथीहरूले बताएका थिए। पछि एकपटक देखिएका थिए। फेरि हराए। त्यहाँ मेला थियो,’ उनले समिति बैठकमा भनिन्।
उनले बेपत्ता गणेश सम्पर्कमा नआएको भन्दै सरकारले खोजी गर्नुपर्ने बताइन्।
‘नेपाली नागरिकको बारेमा यो कुरा यहाँ राखेको हुँ। उहाँको खोजी गरी परिवारलाई सम्पर्क गराउन आग्रह गर्छु। हराएका गणेश लामाको बारेमा गम्भीर हुन आग्रह गर्छु,’ उनले भनिन्।
